Алматы облысында Кореяға жұмысқа орналастыратын арнайы орталық ашылады

Алматы облысында Employment Permit System (EPS) рұқсат беру жүйесі аясында Қазақстан азаматтарын Корея Республикасында заңды жұмысқа орналастыру тетіктері талқыланды, деп хабарлайды  Orda.kz.      

Алматы облысының әкімі Марат Сұлтанғазиев Корея Республикасының еңбек көші-қоны мәселелері жөніндегі делегациясымен кездесу өткізді. Талқылауға сондай-ақ ҚР Еңбек және халықты әлеуметтік қорғау вице-министрі Виктория Шегай және жергілікті атқарушы органдардың өкілдері қатысты.

Аймақ басшысы бұл бастаманы іске асырудың маңызды әлеуметтік-экономикалық мәні бар екенін, өйткені қазақстандықтарға шетелде заңды түрде жұмыс істеуге, халықаралық тәжірибе мен жаңа кәсіби дағдыларды алуға, ал мемлекетке - еңбек көші-қонының ашық және қорғалған тетігін қалыптастыруға мүмкіндік беретінін атап өтті. 

Корей тарабы кадрлар жетіспеушілігін сезініп отырған салаға шетелдік жұмыскерлерді тартуға бағытталған EPS бағдарламасының жұмыс істеу тәртібін ұсынды. Қазіргі уақытта Қазақстан осы жүйеге қосылу мүмкіндігі бойынша келіссөздердің екінші кезеңінен өтті.

Алматы облысының мобильді жұмыспен қамту орталығының директоры Абылай Зуайданың айтуынша, кореялық делегация мамандардың дайындық деңгейі мен инфрақұрылымын бағалай отырып, бейінді колледждер мен оқу орталықтарына барады. Оң шешім қабылданған жағдайда тараптар арасында толыққанды меморандумға қол қою жоспарланып отыр.

Қазақстанның EPS жүйесіне қосылуы кезінде өңірде Оңтүстік Кореяда жұмысқа орналасуға бағдарланған кадрларды даярлау үшін мамандандырылған оқу орталықтарын ашу жоспарланып отыр.

Осы мәселе бойынша түпкілікті шешімді бағалаудың барлық кезеңдері аяқталғаннан кейін Корея Республикасының ведомствоаралық комиссиясы қабылдайтын болады.

Еске салсақ, былтырғы үкіметтің 25 шілдедегі қаулысымен еңбек қызметін жүзеге асыру мақсатында шетелдік азаматтарға жұмысқа кіру үшін жергілікті атқарушы органдардың рұқсаты талап етілмейтын болды.

Оқи отырыңыз:

• «Елдегі жоқшылық»: Қазақстандықтар неге шетелге кетіп жатыр?
• Ресейге нан табуға барып қан майданда жүрген қазақ жігіті
• Бас прокуратура: «Шетелде табыс табамын деп құлдыққа түсу қаупі бар»
• Қазақстан мен Украинаның арнайы қызметтері трансұлттық алаяқтарға қарсы операция жүргізді