Таяу Шығыстағы қақтығыс салдарынан «астық дағдарысы» болуы мүмкін

Таяу Шығыстағы қақтығыс астық өнімі нарығында да ауқымды дағдарыс қаупін туындатып отыр. Бұл туралы БҰҰ-ның Азық-түлік және ауыл шаруашылығы ұйымы шикізат бөліміне бұрын жетекшілік еткен Абдолреза Аббасян мәлімдеді, деп хабарлайды Orda.kz.      

Оның айтуынша, тіпті Ормуз бұғазы ертең ашылғанның өзінде жағдай «айтарлықтай қиын» болып қала береді, ал қақтығыстың әрі қарай созылуы ауыр салдарға әкеледі.

«Егер соғыс тағы бір айға немесе одан да ұзаққа созылса, біз бұрын-соңды болмаған, шын мәнінде аса ауқымды дағдарысқа тап боламыз», — деді Аббасян. 

Ол өзінің БАҚ-қа берген сұхбатында АҚШ пен Израильдің Иранға ашқан соғысы салдарынан карбамид, аммиак және күкірт жеткізілімдері тоқтағанын атап өтті. Нәтижесінде азотты тыңайтқыштардың әлемдік саудасының шамамен 45 пайызы тоқтап қалған, бұзылған немесе қауіп астында тұр. Ал бұл өз кезегінде тыңайтқыш арқылы жанданатын ауыл шаруашылығы өнімдері мен астықтың дер кезінде егілуі мен өсуіне кесірін тигізеді.

Шетелдік БАҚ-тардың мәліметінше, бұл дағдарыс Солтүстік жарты шардағы негізгі ауыл шаруашылығы өңірлері көктемгі егіске дайындалып жатқан кезеңге, ал Австралия қысқы маусымға әзірленіп жатқан уақытқа тұспа-тұс келіп отыр.

Бұған дейін Еуропаның жетекші елдері де Таяу Шығыстағы дағдарыстың теріс салдарын сезіне бастағаны, мұнай өнімдері мен электр құрылғылары тапшылығына тап болғаны хабарланған еді.

Оқи отырыңыз:

• Мұнай дағдарысы: жаһан мұнай қыспағына ұшырамаудың жолын қарастырып жатыр
• Иран АҚШ шарттарын қабылдамаса Трамп елді «тозаққа айналдырмақшы»
• Иранға шабуыл: Әлем басшылары дүниежүзілік соғысқа ұласып кетпесе деп алаңдаулы