Алматы маңында ұшақ бұталар арасына қонып, тергеу басталды

Алматы облысында жеңіл моторлы Ан-2 ұшағы әуежайдан алыстау жерде апатты түрде  қонды. Оқиға бойынша тергеу басталды, деп хабарлайды Orda.kz көлік министрлігіне сілтеме жасап.

Алматы облысында Ан-2 жеңіл моторлы ұшағының апатты қонуынан кейін тексеріс жүргізілуде. Оқиға орнынан түсірілген кадрлар желіде тарады. Видеода ұшақтың төмен биіктікте ұшып келе жатып, белгісіз жерде бұталардың арасына қонғаны көрінеді. Куәгерлердің айтуынша, түсірілім Талдыбұлақ–Қаракемер маңында жасалған.

Аталған аумаққа жақын жерде әуежайлардың жоқтығы әлеуметтік желі қолданушылары арасында сұрақ туғызып, құзырлы органдардың назарын аударды.

Қазақстанның көлік министрлігінің мәліметінше, бұл оқиға адам шығыны жоқ авиациялық оқиға ретінде тіркелген.

«Қазақстан Республикасы Инвестициялар және даму министрінің 2017 жылғы 27 шілдедегі №505 бұйрығымен бекітілген авиациялық оқиғалар мен инциденттерді тергеп-тексеру қағидаларына сәйкес, UP-A0091 тіркеу нөмірлі Ан-2 әуе кемесімен болған оқиға адам шығыны жоқ авиациялық апат ретінде жіктелді және ол ҚР Көлік министрлігінің Көліктегі оқиғалар мен инциденттерді тергеу департаментімен тексеріледі.
Қазіргі уақытта нақты мән-жайды анықтау мақсатында оқиға орнына департамент қызметкері жіберілді» деп хабарлады ведомство.