Әлемдік жанжал: ФИФА коммерциялық құқықтарын жеке инвесторларға сатпайтын болды

ФИФА әлем чемпионаттарына қатысты коммерциялық құқықтардың бір бөлігін жеке инвесторларға сату идеясынан бас тартты. Бұл шешім УЕФА тарапынан айтылған қатаң сын мен бойкоттан кейін қабылданды, деп хабарлайды Orda.kz.       

Сонымен қатар Еуропа, Азия және Солтүстік Америка футбол конфедерациялары да бұл бастамаға қарсы шыққан.

ФИФА президенті Джанни Инфантино әлем чемпионаттарын ұйымдастыру ісіне жеке инвесторларды тарту туралы ұсынысын кері қайтарды. Оның айтуынша, барлық пікірлерді тыңдай келе, бұл жоба келіспеушіліктерге әкелгені және бастапқы мақсатқа сай келмейтіні анықталған.

«Біздің басты мақсатымыз әрдайым біріктіру және дамыту болады», — деді ол. 

Бұған дейін ФИФА FIFA Forward Enterprise атты еншілес компания құрып, оған әлем чемпионаты мен клубтық әлем чемпионатын басқаруды тапсырмақ болған. Турнирдің спорттық бөлігін ФИФА өзі қадағалайды деп жоспарланғанымен, компанияның 20 пайызға дейінгі үлесін жеке инвесторларға беру көзделген.

Бұл мәміле ұйымға 4 миллиард доллардан астам табыс әкелуі мүмкін еді. Сондай-ақ, сарапшылар Инфантино президенттік мерзімі аяқталғаннан кейін осы жаңа құрылымның басшысы болуы мүмкін деген болжам айтқан.

Алайда УЕФА және басқа да құрлықтық ұйымдар бұл бастама футболды шамадан тыс коммерцияландыруға әкеледі деп есептейді. Жобаға Еуропа, Солтүстік және Орталық Америка, сондай-ақ Азия конфедерациялары қарсы шыққандықтан, ол ФИФА ішінде де жеткілікті қолдау таппауы мүмкін еді.

Айта кетейік, УЕФА құрамына 55 ел (оның ішінде Қазақстан да бар), ал КОНКАКАФ құрамына 41 ел, АФК құрамына 47 ел кіреді. Бұған дейін УЕФА барлық мүшелері, соның ішінде Қазақстан футбол федерациясы да, әлем чемпионатын коммерцияландыру жоспарына байланысты ФИФА жарыстарына қатысудан бас тартуы мүмкін екенін мәлімдеген еді. Кейін бұл ұстанымды АФК мен КОНКАКАФ та қолдады.

Біз бұған дейін УЕФА мен оған мүше 55 ел ФИФА жарыстары мен Әлем чемпионатына бойкот жариялағанын жаздық.  Еуропалық футбол ассоциациялары одағы (УЕФА) және ұйым құрамына кіретін 55 ұлттық футбол қауымдастығы ФИФА ұйымдастыратын барлық турнирлерге, соның ішінде Әлем чемпионатына қатысудан бас тарту туралы бірауыздан шешім қабылдаған еді.

Әлемдік футболда ірі жанжал туындауына ФИФА басшылығының әлем чемпионаты құқықтарын жеке инвесторларға сату жоспары себеп болды. Себебі Трамп күйеу баласы арқылы осы додаға қол салды. Шетелдік БАҚ-тар Джанни Инфантино әлем чемпионаттарын ұйымдастыру үшін жеке компания құрып, оның акцияларын Дональд Трамптың жақын ортасының қолдауымен сату жолдарын қарастырып жатқанын жарыса жазды. 

Оқи отырыңыз:

• УЕФА мен оған мүше 55 ел ФИФА жарыстары мен Әлем чемпионатына бойкот жариялады
• Футболдағы әлемдік жанжал: Трамп күйеу баласы арқылы додаға қол салды
• «Қайрат» күтпеген жерден ұпай жоғалтып, «Атырауды» жеңе алмады