Әл-Фарабидегі апат: Күдікті заңға сай жаза алуға дайын екенін айтты

Алматы қаласындағы Әл-Фараби даңғылында үш адамның өмірін қиған қайғылы жол-көлік апаты бойынша ZEEKR электромобилінің жүргізушісіне қатысты сот отырысы басталды, деп хабарлайды Orda.kz.

Алматыда үш адамның өмірін қиған ірі жол апатына қатысты сот басталды. Айыпталушы – 32 жастағы кәсіпкер Александр Пак сот залына балдақпен келіп заңда көрсетілген жазасын өтеуге дайын екенін жеткізді. Сотталушыға Қылмыстық кодекстің 345-1-бабының 4-бөлігі бойынша («Алкогольдік масаң күйде жол қозғалысы ережелерін бұзу, абайсызда екі немесе одан да көп адамның өліміне әкеп соғу») айыбы тағылып отыр.

Айта кетейік, сот процесі ашық өтті. Сот залында күдікті өзін фото-видеоға түсіруге қарсы екенін айтып, БАҚ өкілдерін қатыстырмауды сұрады. Ал жәбірленуші тараптың қорғаушылары соттың ашық процес екенін айтып өз қарсылығын білдірді. Сонымен қатар, күдікті қылмыстық іс материалдарымен қайта танысуға уақыт сұрап, аяғында жарақаты болған соң сот залына келмей сотқа онлайн қатысу туралы өтінішхатын айтты. Сонымен қатар, жәбірленуші тарап та өздерін БАҚ өкілдеріне фото-видеоға түсірмеуді сұрады. 

Мемлекеттік айыптаушы Әлібек Тынысбек Александр Пактың жол-көлік апатына ұшырағанда ішімдік ішкенін айтты.

«Сотталушы жеңіл дәрежеде мас болған, (1,30 промилле) оған қоса тіркеу құжаттарына сәйкес келмейтін мемлекеттік нөмір тағылған  Zeekr электрокарымен 219 шқ/сағ жылдамдықпен қарсы бетке шығып, Mercedes-Benz 300C көлігімен соғысып жол-көлік оқиғасына себеп болды. Соның салдарынан үш адам қаза тапты», — деді прокурор. 

Соққыдан Mercedes-Benz-тің 29 жастағы жүргізушісі мен 2003 және 2005 жылғы екі жолаушысы оқиға орнында көз жұмды.

Жәбірленуші тараптың бірінің қорғаушысы заңгер Шекеев 100 млн теңгеге жуық моралдық талап-арыз беретінін айтты.

Сот залында сотталушы Пак марқұмдардың жақындарынан жылап кешірім сұрады.

«Мен жәбірленуші тараптан кешірім сұраймын. Сіздерге өз көмегімді аямауға дайынмын. Ешқандай сөз сіздерге көмектесе алмайтынын білемін, әр отбасыға қайғы әкелгенімді де түсінемін. Дегенмен де сіздерден кешірім сұраймын. Заңға сай жазамды алуға дайынмын», – деді сотталушы.

Судья Еркін Майшынов ақылдасу бөлмесінде бір сағаттай уақыт болып жоғарыда тараптардың айтқан өтінішхатына қатысты шешім шығарды. Енді келесі сот отырысынан бастап не күдікті, не жәбірленуші тарапты фото-видеоға түсіруге болмайды. Келесі сот отырысы 1 маусымда жалғасады.

Еске сала кетейік, бұл жол-көлік оқиғасы қоғамда кеңінен резонас алып, оқиға президент Қасым-Жомарт Тоқаевқа дейін жеткен еді. 

Оқи отырыңыз:

Алматыда әл-Фараби даңғылындағы жол-көлік оқиғасы бойынша үш қылмыстық іс тергеліп жатыр

Алматыдағы әл-Фараби даңғылында тағы бір жүргізуші әйелді қағып өлтірді

Президент бақылауында: ІІМ Алматыдағы резонансты жол апаты бойынша тергеуді күшейтті