Ақтөбе облысында есірткі сатты деген күдікпен екі полицей ұсталды

Қандыағаш қаласында ҰҚК департаменті қызметкерлері есірткі заттарын заңсыз сатты деген күдікпен екі полицейді ұстады, деп хабарлайды Orda.kz.       

Алдын ала мәлімет бойынша, күдіктілер көліктегі желілік полиция бөлімі ғимараты маңында қылмыс үстінде қолға түскен. Ұсталғандар арасында полиция майоры шеніндегі жедел уәкіл және кіші инспектор-кинолог бар.

Аталған дерек бойынша Қазақстан Республикасы Қылмыстық кодексінің 297-бабы 3-бөлігінің 3-тармағы бойынша сотқа дейінгі тергеу басталды. Бұл баптың санкциясы мүлкін тәркілей отырып, 10 жылдан 15 жылға дейін бас бостандығынан айыруды, сондай-ақ өмір бойы мемлекеттік қызметте және құқық қорғау органдарында жұмыс істеу құқығынан айыруды қарастырады.

Қазіргі уақытта тергеушілер оқиғаның барлық мән-жайын анықтап, басқа тұлғалардың қылмысқа қатысы бар-жоғын тексеріп жатыр.

Оқи отырыңыз:

• 200 миллиард теңгенің темекі контрабандасын шетелден кіргізбекші болғандар ұсталды
• Шомылу маусымы басталғалы 69 бала суға кетіп қайтыс болды
• Қазақстанда миллион теңгеден асатын жалақыны кімдер алады?