Атырауда қайын жұртын қырып тастаған Сұлтан Сәрсемалиевке қатысты сот процесі басталды

Атырау қаласында Жангелдин ауылында бір отбасының төрт мүшесін аса қатыгездікпен өлтірді деп айыпталған Сұлтан Сәрсемалиевке қатысты сот процесі басталды, деп хабарлайды Orda.kz.       

Қазіргі таңда іс Атырау облысының мамандандырылған ауданаралық қылмыстық соты ғимаратында қаралуда. Айыпталушы сотқа биыл наурыз айынан бері қамауда отырған тергеу изоляторынан жеткізілді.

Тергеу барысында Сәрсемалиев бірнеше рет оқиғаға қатысты тергеу әрекеттеріне қатысу үшін изолятордан шығарылған. Алдымен ол Мұнайшы ықшамауданы аумағында, тергеу нұсқасы бойынша, Мирамгүлдің денесі көмілген жерді көрсеткен. Кейін ол қылмыс жасалды делінген Жангелдин ауылы аумағына да жеткізілген.

Бұл іс қоғамда үлкен резонанс туғызды. Сот залына қаза тапқандардың туыстары, қала тұрғындары және Қазақстанның түрлі өңірлерінен келген БАҚ өкілдері жиналды.

Істі судья Зарема Хамидуллина қарап жатыр. Ол бұған дейін де аса ауыр қылмыстар мен өмір бойына бас бостандығынан айыру жазасына қатысты бірқатар резонансты істермен танылған.

Сұлтан Сәрсемалиевке Қазақстан Республикасы Қылмыстық кодексінің 99-бабы 2-бөлігі 1-тармағы («екі немесе одан да көп адамды өлтіру») бойынша айып тағылды. Сонымен қатар тергеу барысында оған қатысты қосымша қылмыстық істер де тіркелген. Олар — 188-бап («ұрлық») және 190-бап («алаяқтық»).

Бұған дейін тергеу негізгі күдікті ретінде 29 жастағы Сұлтан Сәрсемалиевті қамауға алған болатын. Ол әйелі Ақбаян Мұқанғалиевамен бірге шетелге қашып кетіп, Индонезияның Сенару ауылында ұсталып, елге қайтарылды.

Қазіргі уақытта сот процесі жалғасып жатыр.

Оқи отырыңыз:

• Атырауда бір отбасын қырып тастаған қанды қылмыс бойынша тергеу аяқталды
• Атыраудағы қанды іс: Күйеу бала отбасының төрт мүшесін өлтіргенін мойындады, әйелі психикалық орталықта жатыр
• Атыраудағы қайын жұртын қырып тастаған күдіктіге ұрлық пен алаяқтық айыптары қосылды