АҚШ-тың Денвер әуежайында ұшақ ұшу-қону жолағында адамды қағып кетті

АҚШ-тың Денвер қаласындағы халықаралық әуежайда Frontier Airlines әуе компаниясына тиесілі Airbus A321 ұшағы ұшу-қону жолағында адамды қағып кетті. Ұшақ кешкі уақытта Лос-Анджелеске ұшуға дайындалып, ұшу жолағына бет алған сәтте кенеттен жолға бір адам шыққан, деп хабарлайды Orda.kz.        

Оның ол жерге қалай тап болғаны әзірге белгісіз. Белгілісі ол оқиға орнында қаза тапқан, бұл туралы  CBS News хабарлады.

Диспетчерлермен болған әңгіме жазбасында ұшқыш: «Мұнара, Frontier 4345, біз ұшу жолағында тоқтап тұрмыз. Біз жаңа ғана біреуді қағып кеттік» дейді. Кейін ол қозғалтқыштан өрт шыққанын хабарлаған. Диспетчерлер дереу маңайдағы барлық ұшақтарды тоқтатып, бортта қанша адам бар екенін нақтылаған.

Оқиға орнына өрт сөндірушілер мен құтқарушылар жіберіліп, жолаушылар автобуспен әуежай ғимаратына жеткізілді. Тергеуді АҚШ-тың Ұлттық көлік қауіпсіздігі кеңесі қолға алды.

Frontier Airlines мәліметінше, оқиға кезінде борттағы 224 жолаушы мен жеті экипаж мүшесінің ешқайсысы ауыр жарақат алмаған. Әуежай өкілдері 12 адамның жеңіл жарақат алғанын, олардың бесеуі жергілікті ауруханаларға жеткізілгенін хабарлады.

Әуежай өкілдерінің айтуынша, жеке басы анықталмаған адам қоршаудан асып өтіп, шамамен екі минуттан кейін ұшу-қону жолағын кесіп өтпек болған кезде ұшақ астында қалған. Қоршау бүлінбеген, дегенмен оның әуежай қызметкері болмууы мүмкін деген болжам бар. АҚШ көлік министрі Шон Даффи қаза тапқан адамды тәртіп бұзушы деп атады.

Frontier Airlines әуе компаниясы оқиғаға тексеру жүргізуде. Көліктегі қауіпсіздік жөніндегі ұлттық кеңеске де ескертілді.

Денвер халықаралық әуежайының мәліметінше, апат болған ұшу-қону жолағы жергілікті уақыт бойынша сағат 11-ге дейін қайта ашылды.

Оқи отырыңыз:

• Көкшетауда жол талғамайтын көлік жайбарақат кетіп бара жатқан әйелді жаншып өтті
• ДДСҰ басшысы хантавирус өршіген кемені эвакуациялауды жеке бақылайды
• Путин мен Зеленский кездесетін жерді шеше алмай әлек