АҚШ Ормуз бұғазы арқылы мұнай тасымалдаудың құпия жолын тауып алған

Америка Құрама Штаттары Ормуз бұғазы арқылы тәулігіне миллиондаған баррель мұнай тасымалдауға мүмкіндік беретін құпия теңіз дәлізін ұйымдастырған, деп хабарлайды Orda.kz Axios басылымына сілтеме жасап.

Басылымның мәліметінше, құпия бағыт туралы АҚШ-тың екі шенеунігі хабарлаған. Олардың айтуынша, соңғы бірнеше апта бойы күн сайын түнде Ормуз бұғазына 15-20 мұнай тасымалдаушы танкер кіріп-шығып жүр. Осылайша тәулігіне шамамен 10 миллион баррель мұнай тасымалдауға мүмкіндік жасалған.

«Біз Ормуз бұғазының оңтүстік бөлігін екі айдан бері бақылауымызда ұстап отырмыз. Иран Ислам революциясы сақшылары кедергі келтіруі мүмкін, бірақ бұғазды олар бақыламайды. Мұны біз істеп отырмыз», – деген америкалық шенеуніктердің бірі басылымға. 

Мәліметке сәйкес, АҚШ әскери күштері танкерлердің Араб теңізінен Ормуз бұғазы арқылы Парсы шығанағына кіруіне, аймақтағы елдерден мұнай тиеуіне және кейін қайтадан бұғаз арқылы шығуына көмектесіп жатыр.

Америкалық шенеуніктердің айтуынша, жанармай мен мұнай тасымалдаудың қайта жандануы АҚШ Орталық қолбасшылығы жүргізген жуырдағы екі апталық әскери операциядан кейін мүмкін болған. Операция барысында Иранның радиолокациялық жүйелері мен теңіздегі бақылау құралдарының жұмысы істен шығарылған.

Бұған дейін Ақ үй басшысы Дональд Трамп Truth Social әлеуметтік желісінде Ормуз бұғазы бейнеленген картаны жариялап, оған «АҚШ-тың жаңа аумағы» деген жазу қалдырған еді.

Бұл мәлімдемеге жауап берген Иран Сыртқы істер министрінің орынбасары Казем Гарибабади АҚШ президентінің Ормуз бұғазына қатысты «қате түсініктерін түзететінін» айтқан.

Ал бүгін Трамп Иранға қарсы «жойқын экономикалық операцияның» басталғанын жариялап, басқа мемлекеттерге де ескерту жасады.

Ормуз бұғазы әлемдегі мұнай тасымалы үшін аса маңызды теңіз жолдарының бірі саналады. Парсы шығанағындағы мұнай өндіруші елдерден әлемдік нарыққа шығарылатын энергия ресурстарының едәуір бөлігі осы тар су жолы арқылы өтеді. Сондықтан бұғаздағы кез келген әскери немесе саяси шиеленіс мұнай бағасына және жаһандық энергия нарығына тікелей әсер етуі мүмкін.

Бұған дейін Парсы шығанағында тұрып қалған кемелер бүкіл әлемге қауіпті инвазиялық балдырлар мен омыртқасыздардың таралуына себеп болуы мүмкін екенін жаздық. Ормуз бұғазының қоршауда қалуы жаһандық экологиялық мәселеге әкелуі мүмкін екенін айтып әлем ғалымдары жар салып жатыр.

Иран АҚШ-тың Парсы және Оман шығанақтарына, сондай-ақ Ормуз бұғазына кіруіне тыйым салды. Иран армиясының қолбасшысы, генерал Амир Хатами Вашингтонның аймақтан «қуылғанын» мәлімдеді.

Оқи отырыңыз:

• Иран Трамптың Ормуз бұғазын АҚШ-тікі деп жариялау жоспарына жауап берді
• Парсы шығанағында тұрып қалған кемелер әлемді экологиялық апатқа ұшырата ма?
• Иран АҚШ-тың Ормуз бұғазына кіруіне тыйым салды