АҚШ он түн қатарынан Иранға оқ жаудырды: Мұнай бағасы шарықтап кетті

Ресми мәлімдемеге сенсек, операцияның негізгі мақсаты — Ормуз бұғазы арқылы өтетін коммерциялық кемелер мен азаматтық теңізшілерге қарсы Иранның шабуыл жасау мүмкіндігін әлсірету, деп хабарлайды Orda.kz.    

АҚШ Қарулы күштерінің Орталық қолбасшылығының (CENTCOM) мәліметінше, соққылар әскери басқару орталықтарына, әуе шабуылына қарсы қорғаныс нысандарына, жағалауды бақылау жүйелеріне, зымыран және ұшқышсыз аппарат ұшыру позицияларына, сондай-ақ байланыс құралдарына бағытталған. 

CENTCOM өкілдері америкалық әскери күштер «Жоғарғы бас қолбасшының бұйрығымен» әрекет етіп жатқанын атап өтті.

Ақ үй аймақтағы сауда кемелеріне жасалған шабуылдар үшін жауапкершілікті Иран басшылығына жүктеді. Вашингтон Тегеранды бұғаз арқылы өтетін халықаралық коммерциялық флотқа қауіп төндіру мүмкіндігінен айыруды көздейтінін мәлімдеді.

Өз кезегінде Иранның Ислам революциясы сақшылар корпусы Ормуз бұғазы АҚШ соққылары жалғасқан жағдайда жоғары қауіп аймағы болып қала беретінін хабарлады.

Ормуз бұғазы — әлемдегі ең маңызды энергетикалық дәліздердің бірі. Әлемдік мұнай тасымалының шамамен 20 пайызға жуығы дәл осы тар өткел арқылы өтеді. Сондықтан өңірдегі кез келген шиеленіс жаһандық энергетикалық нарыққа бірден әсер етеді.

Соңғы оқиғалар аясында мұнай бағасы күрт өсті. Азиядағы сауда барысында Brent маркалы мұнайдың қыркүйек айындағы фьючерстері 3 пайыздан астам қымбаттап, барреліне 90 доллардан асты. Маусым айының ортасынан бері ең жоғары көрсеткішке жетті.

Таяу Шығыстағы жағдай ушыға түссе, мұнай бағасы одан әрі көтерілуі мүмкін. Сонымен қатар, бұл жағдай жаһандық инфляция мен логистикалық тізбектерге қосымша қысым түсіруі ықтимал.

Бұған дейін Иран АҚШ өзінің энергетикалық инфрақұрылымына соққы жасаған жағдайда Қызыл теңіз арқылы өтетін мұнай тасымалы жолын жабуға дайын болуды сұрап, Йемендегі хуситтер қозғалысына жүгінген болатын. 

Оқи отырыңыз:

• Иран хуситтерден мұнай тасымалының тағы бір бағытын жабуды сұрады
• Иран Американың Кувейт пен Иорданиядағы әскери нысандарына жаңа соққы жасады
• Иран Ормуз бұғазына шығатын жолды қайта бұғаттады