АҚШ Қазақстанға тағы 37 миллиард доллар инвестиция салмақшы

Астанада өткен «Қазақстан — АҚШ» дөңгелек үстелінде Қазақстан америкалық компанияларға инвестиция салудың жаңа бағыттарын ұсынды, деп хабарлайды Orda.kz. 

Екі жақ сирек жер металдары, Транскаспий бағыты, жасанды интеллект, финтех, агроөнеркәсіп және бірлескен өндірістер саласындағы жобаларды талқылады.

Келіссөздерге премьер-министрдің орынбасары – Ұлттық экономика министрі Серік Жұманғарин, президенттің АҚШ-пен ынтымақтастық жөніндегі арнайы өкілі Ержан Қазыхан, АҚШ-тың Қазақстандағы дипломатиялық миссиясы басшысының орынбасары Дебора Робинсон, «Атамекен» ҰКП төрағасы Қанат Шарлапаев және АҚШ Сауда палатасының аға вице-президенті Хуш Чокси қатысты.

Қанат Шарлапаевтың айтуынша, америкалық компаниялар тәуелсіз Қазақстанның алғашқы стратегиялық инвесторларының қатарында болған. Қазіргі таңда екі ел арасындағы ынтымақтастық саудадан технологиялық кооперацияға, өндірісті жергіліктендіруге және бірлескен инвестициялық жобаларға ауысып келеді.

Басым бағыттар ретінде критикалық материалдар мен сирек жер металдары, Транскаспий халықаралық көлік бағыты, цифрлық экономика, жасанды интеллект, финтех, агроөнеркәсіп кешені,ғылыми-зерттеу орталықтары аталды.

Осы орайда мнвестиция көлемі 137 млрд долларға жетуі мүмкін.  АҚШ Сауда палатасының өкілі Хуш Чоксидің айтуынша, қазіргі таңда АҚШ-тың Қазақстан экономикасына салған жалпы инвестиция көлемі 100 млрд доллардан асқан.

«Біз одан әрі өсім үшін үлкен әлеует көріп отырмыз. Инвестиция көлемін 137 млрд долларға дейін жеткізу – қолжетімді мақсат және бұл біздің экономикалық ынтымақтастығымыздың келесі кезеңін білдіреді», – деді ол. 

Кездесуге квазимемлекеттік сектор, қаржы ұйымдары және америкалық ірі бизнес өкілдері қатысты. Олардың қатарында:

• Chevron
• ExxonMobil
• Apple
• Mastercard
• Shell
• Honeywell және басқа да компаниялар бар.

Сондай-ақ қазақстандық тараптан «ҚазМұнайГаз», «Қазақстан темір жолы», АХҚО, Freedom Holding Corp., BI Group секілді ұйымдар қатысты.

Негізгі талқыланған мәселелер қатарында тараптар инвестициялық ахуалды жақсарту, энергетика, көлік және логистика, цифрландыру, инфрақұрылым, қаржы секторы және Қазақстандағы америкалық бизнестің қатысуын кеңейту мәселелерін жан-жақты қарастырды.

Бұл келіссөздер Қазақстанның халықаралық инвестициялық тартымдылығын арттырып, ел экономикасының жаңа бағыттар бойынша дамуына серпін беруі мүмкін.

Оқи отырыңыз:

• Қазақстанда әуетакси мен дрондарды пайдалануға арналған заңнамалық негіз қалыптасты
• Үкімет ең төменгі жалақы мөлшерін арттыру мәселесін қарастырады
• Ұлттық домбыра күні: Астанада қандай іс-шаралар өтеді?