АҚШ Иранға қарсы жауапты соққы берді: Ормуз бұғазындағы шиеленіс күшейді

10 маусым 2026 11:22 Ләззат Нұрсапақызы

Фото: Ашық дереккөзден

АҚШ Орталық қолбасшылығының (CENTCOM) күштері Иран тарапынан америкалық Apache тікұшағының атып түсірілуіне жауап ретінде жүргізілген әскери операцияны аяқтады, деп хабарлайды Orda.kz.

Бұл туралы ресми мәліметтерде 9 маусым күні операцияның өзін-өзі қорғау мақсатында жүзеге асқаны айтылды.

Аталған операция АҚШ Орталық қолбасшылығының бұйрығымен жүргізіліп, оған АҚШ Әуе күштері мен Әскери-теңіз күштерінің жойғыш ұшақтары тартылған. Жоғары дәлдіктегі қару қолданылған соққылар Иранның әуе қорғаныс жүйелеріне, жердегі басқару пункттеріне және радиолокациялық бақылау станцияларына бағытталды. Нысандар негізінен стратегиялық маңызы зор Ормуз бұғазы маңында орналасқан.

Бұл бұғаз – әлемдегі мұнай тасымалының негізгі жолдарының бірі. Сарапшылардың айтуынша, күн сайын әлемдік мұнайдың шамамен 20%-ы осы аймақ арқылы өтеді. Сондықтан мұнда кез келген әскери шиеленіс жаһандық энергетикалық нарыққа тікелей әсер етеді.

АҚШ тарапы бұл операцияны «пропорционалды жауап» деп бағалап отыр. Өйткені соңғы уақытта америкалық әскери күштерге және халықаралық сауда кемелеріне қарсы шабуылдар жиілеген. Ресми Вашингтон Иран тарапынан болған әрекеттерді «негізсіз агрессия» деп атап, өз күштерін қорғауға толық дайын екенін мәлімдеді.

Айта кету керек, АҚШ пен Иран арасындағы қарым-қатынас соңғы жылдары тұрақсыз күйде қалып отыр. 2019 жылдан бері Парсы шығанағы аймағында танкерлерге шабуылдар, дрондардың атып түсірілуі және әскери нысандарға соққылар жиі тіркелген. Бұл жағдай өңірдегі қауіпсіздікке ғана емес, халықаралық сауда мен энергетикалық тұрақтылыққа да қауіп төндіреді.

Сарапшылар қазіргі жағдайдың ушығуы екі ел арасындағы тікелей қақтығысқа алып келмеуі үшін дипломатиялық арналардың маңызы артып отырғанын айтады. Алайда әскери әрекеттердің жалғасуы аймақтағы геосаяси ахуалды одан әрі күрделендіруі мүмкін.

Оқи отырыңыз:

Жаңалықтар

барлық жаңалықтар