Адвокат әділетсіз сот шешімдері бойынша істерді Тоқаевқа жолдамақшы

Адвокат Шолпан Исмаилова әлеуметтік желіде Қазақстан президенті Қасым-Жомарт Тоқаевқа жолдау үшін сот шешімі әділетсіз шыққан істерді жинай бастағанын мәлімдеді, деп хабарлайды Orda.kz.       

«Әрдайым менімен бірге болып, сот жүйесінің жай-күйіне, жекелеген істерді қарау кезінде заңдылық пен әділеттілік мәселелеріне алаңдайтын азаматтарға үндеу жасаймын. Қазіргі уақытта ықтимал сот қателіктері, заңсыз шешімдер мен үкімдер туралы нақты деректерді ең жоғары деңгейге жеткізуге мүмкіндік пайда болды. Президент әкімшілігі осындай істер бойынша материалдарды зерделеу және талдау үшін сұратып отыр. Егер сіздің тәжірибеңізде немесе өміріңізде, сіздің ойыңызша, заң талаптары елеулі бұзылған, заңсыз сот актілері шығарылған немесе әділетсіз үкімдер қабылданған істер болса, осы жазбаның астына пікір қалдырып немесе менімен байланысуыңызды сұраймын» деп жазды Исмаилова әлеуметтік желідегі парақшасында. 

Адвокаттың айтуынша, мәселе жай ғана сот шешімімен келіспеуде емес, керісінше заңдылыққа, объективтілікке және процеске қатысушылардың құқықтарының сақталуына қатысты елеулі сұрақтар туындайтын жағдайлар туралы болып отыр.

«Өз істері бойынша ақпарат ұсынуға дайын және бар мәселелердің естіліп, тиісті бағасын алғанын қалайтын азаматтарды үн қатуға шақырамын. Тек бірлескен күш-жігер арқылы ғана сот төрелігінің сапасын арттырып, заң үстемдігі қағидатын нығайта аламыз. Бұл үндеу менің пікірім мен көзқарасымды қолдайтын азаматтарға арналған», – деді Исмаилова. 

Еске сала кетейік, 4 маусым күні Исмаилова адвокаттардың президент Тоқаевқа жолдаған үндеуін жариялаған болатын. Онда халықтың сот әділдігіне деген сенімі төмендей бастағаны айтылған.

Оқи отырыңыз:

• Санжар Боқаевты қамауда ұстау мерзімі 18 шілдеге дейін ұзартылды
• «Қылмыстық қудалау тоқтады» Данияр Мейірханның адвокаты жаңа мәлімдеме жасады
• Алматы полициясы 12 жастағы баланың өліміне қатысты тергеу барысы туралы мәлімет берді