Алматы полициясы 12 жастағы баланың өліміне қатысты тергеу барысы туралы мәлімет берді

14 маусым 2026 08:11 Ләззат Нұрсапақызы

Фото: Orda.kz

Қайғылы оқиға 10 маусым күні болған. Пышақ жарақатын алған 12 жастағы мектеп оқушысы көз жұмды. Кісі өлтірді деген күдікпен марқұммен таныс болған 13 жастағы алматылық жасөспірім ұсталған еді, деп хабарлайды Orda.kz.

Полиция мәліметінше, қылмысты тергеу үшін арнайы жедел-тергеу тобы құрылған. Сотқа дейінгі тергеу аясында барлық қажетті тергеу әрекеттері жүргізіліп жатыр.

Тергеушілер оқиға орнынан және оған жақын аумақтардан алынған бейнежазбаларды, сондай-ақ қайғылы жағдайдың барлық мән-жайын анықтауға көмектесуі мүмкін басқа да цифрлық деректерді зерттеп, қылмыстық іс материалдарына тіркеген.

«Барлық уәждер мен нұсқалар тексеріліп жатыр» деп мәлімдеді полиция департаменті.

Қазіргі уақытта қылмысқа бір кәмелетке толмаған жасөспірімнің қатысы бар екені анықталған. Күдікті ұсталып, арнайы мекемеге орналастырылған.

Алматы қаласы полиция департаментінің мәліметінше, өлімге әкелген пышақ жарақаттары өзара келіспеушілік салдарынан туындаған жанжал кезінде салынған.

Алдын ала анықталған деректерге, соның ішінде бейнежазбалар мен хат алмасуларға сәйкес, қаза тапқан жасөспірім мәселені анықтау үшін күдіктінің үйіне барған.

Полиция сондай-ақ жәбірленуші тарапқа іс бойынша қазіргі уақытта белгілі барлық мән-жайлар түсіндірілгенін хабарлады.

Тергеу барысы қалалық полиция департаменті басшылығының ерекше бақылауында.

Бұған дейін марқұм баланың туыстары оған тоғыз жерден пышақ салынғанын мәлімдеген болатын. Олар күдіктінің жасына байланысты қатаң жазадан құтылып кетуі мүмкін деп алаңдаған. Сондай-ақ тәркіленген бейнежазбаларға қол жеткізе алмағандарын және тергеудің барлық егжей-тегжейін білмегендерін айтқан еді.

Енді полиция жәбірленуші тарапқа іс бойынша қажетті түсіндіру жұмыстары жүргізілгенін мәлімдеді.

Баланың жаназасы жұма күні шығарылды.

Оқи отырыңыз:

Жаңалықтар

барлық жаңалықтар