19 шілдеден бастап Қазақстанда бірыңғай QR-код іске қосылады

Енді қазақстандықтар кез келген банк қосымшасы арқылы жүйеге қосылған кез келген сауда нүктесінде тауарлар мен қызмет үшін төлем жасай алады, деп хабарлайды Orda.kz.       

19 шілдеден бастап Қазақстанда бірыңғай QR-код ресми түрде іске қосылатыны туралы Қазақстан Ұлттық банкі төрағасы Тимур Сүлейменов мәлімдеді.

Ұлттық банк басшысының айтуынша, бірыңғай QR-ды енгізу – цифрлық төлемдер саласындағы ең маңызды жобалардың бірі.

«Бұл әрқайсымызға тұтынушы ретінде тікелей қатысты. Біз күн сайын төлем жасаймыз. Бірыңғай QR ресми түрде 19 шілдеден бастап күшіне енеді. Бұл күн жексенбіге сәйкес келгендіктен, біз оның жұмысын бүгіннен бастап көрсетуді жөн көрдік», – деді Сүлейменов брифингте.

Жоба іске қосылғаннан кейін қазақстандықтар өз банкі қосымшасы арқылы, кәсіпкер қай банктің қызметін пайдаланатынына қарамастан, кез келген сауда орнында еркін төлем жасай алады.

«Клиенттер өз банкі қосымшасы арқылы кез келген кәсіпкердің сауда нүктесінде тауарлар мен қызметтерге кедергісіз төлем жасай алады», – деді ол.

Сүлейменовтің айтуынша, бұл жобаны дайындау ұзақ уақыт алып, екінші деңгейлі банктер тарапынан ауқымды техникалық жұмысты талап еткен.

«Әр банк өз сервистерін дамытты, кейін біз оларды біріктіруді ұсындық. Жүйелердің үйлесімділігін, өзара байланысын және деректер қауіпсіздігін қамтамасыз ету қажет болды», – деп түсіндірді ол. 

Ұлттық банк басшысы жобаны жүзеге асыруға қатысқан екінші деңгейлі банктерге, Ұлттық төлем корпорациясы және Ұлттық банктің цифрлық блогына алғыс білдірді.

Оның пікірінше, ұлттық цифрлық қаржылық инфрақұрылымды құру заманауи цифрлық мемлекетті дамытуға маңызды үлес қосады.

Оқи отырыңыз:

• «Қайрат» клубы мәлімдеме жасады: Канье Уэсттің концерті келісілмеген
• Не себепті Қазақстан банктері зейнеткерлерге несие беру рәсімін күрделендірді?
• Есет Байкен Ұлытау облысына әкім болып тағайындалды