102 адам мейрамханадағы астан уланды: Сот қылмыстық іс қозғады

Ақтөбе облысының Мұғалжар ауданындағы Қандыағаш қаласында орналасқан «Тұмар» мейрамханасында өткен шараға қатысқан 102 адам астан уланып, ауруханаға түскен еді. Сот осы факті бойынша қылмыстық іс қозғады, деп хабарлайды Orda.kz.       

Тергеу «санитарлық қағидаларды бұзу» бабы бойынша жүргізілуде.

Ақтөбе облысының Қандыағаш қаласындағы мейрамханада салтанатты шараға қатысқан 102 адам бірдей уланып аурухана  түскенін  кеше жазған едік. Енді осы жаппай улану оқиғасы бойынша сотқа дейінгі тергеу басталды.

Өңірлік полиция департаментінің мәліметінше, сотқа дейінгі тергеу Қылмыстық кодекстің 304-бабы (санитарлық қағидаларды немесе гигиеналық нормативтерді бұзу) бойынша жүргізілуде. Тергеу аясында қажетті тергеу әрекеттері жүзеге асырылып жатыр.

Ақтөбе облысы Мұғалжар ауданындағы Қандыағаш қаласында мейрамханаға барғаннан кейін 102 адам ішек инфекциясымен ауруханаға жатқызылды. Ауруханаға түскендердің барлығының жағдайы орташа ауыр деп бағалануда.

Алдын ала болжам бойынша, жаппай улануға ет өнімдері себеп болуы мүмкін. Қазіргі уақытта мейрамхана эпидемиологиялық тексеру аяқталғанша уақытша жабылды.

Оқиғаны бақылау үшін жедел штаб құрылып, Мұғалжар ауданына қосымша медициналық бригадалар жіберілді. Мамандар байланыста болған адамдарды анықтап, оларды бақылауға алған.

Оқиғаның барлық мән-жайы анықталғанға дейін эпидемияға қарсы және профилактикалық іс-шараларды жүргізу кезеңінде мейрамхананың қызметі уақытша тоқтатылды.

Оқи отырыңыз:

• Ақтөбе облысында 102 адам мейрамханадағы астан уланып, ауруханаға түсті
• Министрлік: Декреттегі аналардың курьер болып нәпақа табуы әлеуметтік төлемдерден айыруға себеп емес
• Көкшетауда жаяу жүргіншіні қағып өлтірген әйелдің жазасы кейінге қалдырылды