Ақтөбе облысында 102 адам мейрамханадағы астан уланып, ауруханаға түсті

Ақтөбе облысының Мұғалжар ауданындағы Қандыағаш қаласында орналасқан «Тұмар» мейрамханасында өткен шараға қатысқан 102 адам ауруханаға түсті, деп хабарлайды Orda.kz.       

Олар екі күн қатарынан ұйымдастырылған ас беру мен тойдың қонақтары. Осы мейрамханада тамақтанған қонақтардың жағдайы күрт нашарлап, дәрігерлер оларға ішек инфекциясы диагнозын қойған. Ауру белгілері байқалған тұрғындар аудандық орталықтағы және Ақтөбе қаласындағы ауруханаларға жөнелген.

Ақтөбе облысы әкімдігінің мәліметінше, 19 маусымнан бастап Мұғалжар аудандық ауруханасы мен облыстық клиникалық жұқпалы аурулар ауруханасына ішек инфекциясы белгілерімен 102 науқас жеткізілген.

Алдын ала болжам бойынша, жаппай улануға ет өнімдері себеп болуы мүмкін. Қазіргі уақытта мейрамхана эпидемиологиялық тексеру аяқталғанша уақытша жабылды.

Оқиғаны бақылау үшін жедел штаб құрылып, Мұғалжар ауданына қосымша медициналық бригадалар жіберілді. Мамандар байланыста болған адамдарды анықтап, оларды бақылауға алған.

Оқи отырыңыз:

• Ұлыбритания премьер-министрі Кир Стармер қызметінен кететінін мәлімдеді
• Пак сотта соңғы сөзін айтты: «Саяси ықпалды тұлғаға қатысым жоқ»
• Кедендік рәсімдерді жеделдету үшін заңсыз делдалдық қызмет көрсететіндер ұсталды