Көкшетауда жаяу жүргіншіні қағып өлтірген әйелдің жазасы кейінге қалдырылды

Көкшетау қаласында сот жүргізуші куәлігінсіз көлік айдап, адам өліміне себеп болған әйелге қатысты үкім шығарды, деп хабарлайды Orda.kz.       

Сот шешімімен айыпталушыға екі жыл алты ай бас бостандығынан айыру жазасы тағайындалды. Алайда жаза өтеу мерзімі үш жылға кейінге шегерілді. Бұған жеңілдететін мән-жайлар себеп болған. Атап айтқанда, оның екі кәмелетке толмаған баласының болуы, бұрын сотталмағаны, кінәсін мойындап, өкінуі және моральдық шығынды өтегені ескерілді.

Сот барысында жәбірленуші тараптың да пікірі назарға алынды. Олар айыпталушыны бас бостандығынан айырмауды сұраған.

Тергеу нұсқасы бойынша, әйел күйеуінің денсаулығы нашарлағандықтан, оның рұқсатымен көлік тізгініне отырған. Алайда оның жүргізуші куәлігі болмаған.

Сонымен қатар, сотталған әйелдің жұбайына қатысты да бөлек іс қозғалған. Ол – көлік иесі ретінде жүргізуші куәлігі жоқ адамға көлікті басқаруға рұқсат бергені үшін жауапқа тартылуы мүмкін.

Еске салайық, қайғылы оқиға мамыр айында тұрғын үй ауласында болған. Әйел басқарған автокөлік 52 жастағы жаяу жүргіншіні басып өткен. Зардап шеккен адам алған жарақаттарының салдарынан ауруханада көз жұмды. 

Көкшетауда жайбарақ кетіп бара жатқан әйелді басып-жаншып өткен  жол-көлік оқиғасы бойынша екі қылмыстық іс қозғалды. Белгілі болғандай, ер адам жүргізуші куәлігі жоқ әйеліне көлік тізгінін берген.

Оқиға болған сәттің бейнесі әлеуметтік желілерде тарап, жұрттың жағасын ұстатты. Кадрларда әйел тротуарға қарай келе жатқан кезде жол талғамайтын көлік оны қағып, басып өтіп, тек ол толық көлік астында жаншылғаннан кейін ғана тоқтағаны көрінеді.

Мұндай істерде сот шешімі әрдайым жеке жағдайларға байланысты қабылданады. Қазақстан заңнамасында кәмелетке толмаған балалары бар әйелдерге қатысты жазаны кейінге қалдыру тәжірибесі қарастырылған.

Оқи отырыңыз:

• Көкшетауда жол талғамайтын көлік жайбарақат кетіп бара жатқан әйелді жаншып өтті
• Көкшетауда көлікпен әйелді жаншып өткен оқиғаға қатысты екі қылмыстық іс қозғалды