Зумерлер көтерілісі: мэрді өлтіргеннен кейін Мексиканы наразылық толқыны жайлады

Сенбі күні Мексика бойынша мыңдаған адам «Z ұрпақтар» ұранымен Ұрапан мэрі Карлос Мансоны өлтіргеннен кейінгі зорлық-зомбылықтың артқанын айыптап, наразылық акциясына шықты, деп хабарлайды Orda.kz Reuters агенттігіне сілтеме жасап.

Қала басшысын 1 қарашада Қайтыс болғандар күніне арналған көпшілік шарада атып өлтірді. Мехикода маскалы наразы топ президент Клаудия Шейнбаум тұратын Ұлттық сарайдың қоршауын сындырды. Бұл көзден жас ағызатын газ қолданған полициямен қақтығысқа әкелді.

Елордадағы билік зардап шеккен 100 полиция қызметкері мен 20 азамат туралы хабарлады; 20 қатысушы тұтқындалды, тағы 20 адам әкімшілік жауапкершілікке тартылды. Шерулер кезінде Мексикадағы демонстранттар - «Морена кетсін!», басқалары - «Карлос өлген жоқ, оны үкімет өлтірді!» деп айқайлады. Митингілер елдің басқа да қалаларында, соның ішінде Мичоакан штатында да өтті.

Акцияға шақырған «Мексиканың Z ұрпақтары» тобы ешқандай партияға қатысы жоқ екенін және зорлық-зомбылық, сыбайлас жемқорлық пен билікті теріс пайдаланудан шаршаған жастардан құралғанын манифесте мәлімдеді. Z буыны 1997-2012 жылдары туған адамдарды қамтиды және бүкіл әлем бойынша осы атаудағы топтар әлеуметтік және саяси өзгерістерді қолдайды.

Шейнбаум үкіметі жастардың бұл әрекетіне күмән келтіріп, оларды көбінесе оңға бағытталған оппоненттер ұйымдастырып, әлеуметтік желілердегі боттар арқылы наразылықтарды насихаттайды деп мәлімдеді.

Қыркүйек айында Непал билігі Facebook, Instagram, YouTube, X, Reddit және LinkedIn сияқты ірі әлеуметтік желілерді жергілікті министрлікте тіркелмегені үшін бұғаттады. Бұл елдегі жастардың ызасына тиіп, наразылық танытуына себеп болды. 1995–2012 жылдар аралығында туған жастар өздерінің көтерілістерін «Зумерлер революциясы» деп атады.

Шетелде зумерлер ұрпағы өкіметті өзгерткісі келсе, біздің елде қыршынынан қиылып, кісі қолынан қаза тауып жатыр: Ақмола облысында жеткіншек қызды  қатыгездікпен пышақтап өлтірген күдікті ұсталды.