«Журналистерді босатуды талап етті»: Алматыда тағы бір белсенді пикетке шықты

«Oyan, Qazaqstan» қозғалысының мүшесі Ақмарал Жәкібаева да пикетке шықты, деп хабарлайды Orda.kz Азаттыққа сілтеме жасап. 

Ақмарал Жәкібаева Qaznews24 сатиралық паблигінің авторы Темірлан Еңсебек пен пикетке шыққан журналистер – Әсем Жәпішева мен Руслан Бикетовті босатуды талап етті.

Еске салайық, бүгін Qaznews24 сатиралық паблигінің авторы Темірлан Еңсебекке қолдау білдірген Сергей Зинченко да ұсталған еді. 

Ол жалғыз өзі Темірлан Еңсебекті қолдап пикетке шықты. Белсендіге әкімдік, прокуратура және полиция қызметкерлері келді. Олар бейбіт митинг туралы хабарлама алмағанын айтып, пикетті тоқтатуды талап етті. Сергей Зинченко талаптан бас тартқан соң, оны ұстап әкетті. 

Айта кетейік, 17 қаңтар күні QazNews24 қоғамдық парақшасының әкімшісі 2 айға қамалды. 19 қаңтар күні журналист әрі Art of Her журналының бұрынғы бас редакторы Руслан Бикетов жалғыз өзі пикетке шыққан еді. Оны да полиция алып кетіп, 15 күнге қамады. 

Кеше, 20 қаңтарда пикетке шыққан журналист Жәпішева да ұсталып, қамалды. Журналистке «Бейбіт жиын өткізу тәртібін бұзды» (488-бап) деген айып тағылған. Жәпішева сот шешіміне келіспейді. Адвокат Ғалым Нұрпейісов апелляциялық шағым түсіретінін мәлімдеді.