Журналист Думан Мұхаммедкәрімді 2 айға карцерге қамап тастады

Журналист Думан Мұхаммедкәрімді 2 айға карцерге қамап тастады. Aқпаратты Думан Мұхаммедкәрімнің адвокаты Ғалым Нұрпейісов Orda.kz сайтының тілшісіне растады.

Ғалым Нұрпейісовтің сөзінше Думан Мұхаммедкәрім түрме киімін кимегені және дәретхана жумағаны үшін 60 күнге карцерге қамалған. 

«Ең басында оны ауруханаға апарып, МРТ-ға түсіп, емделіп жүрген. Карцерден шығарды. Енді қайта 60 күнге қамап тастап жатыр. Ішкі тәртіпті орындамағаны үшін деп айтып жатыр ғой. Түрменің киімін кимей, ішкі жұмыстарды істеуден бас тартқан. Думан айтады: «мен ішкі жұмыстардан бас тартпаймын. Камераны жинаймын, едендң жуамын. Бірақ мен дәретхананы жумаймын, себебі ол жалпы көпшіліктің отыратын дәретханасы. Бірақ ішкі жұмыстардан бас тартпаймын деп айтты», — деді Ғалым Нұрпейісов.

Думан Мұхаммедкәрім «тыйым салынған ұйымның ісіне араласты» және «экстремизмді қаржыландыру» деген айыптармен ұсталған болатын. 20 рет сот отырысы өтіп, 2 тамыз күні үкім шықты. 

Бүгін ол 405-баптың 2-бөлігі және 258-баптың 1-бөлігі бойынша айыпты деп танылып, 7 жыл бас бостандығынан айырылды.

Еске сала кетейік, сотқа дейін Думанның ісіне қатысты өткен баспасөз мәслихаты жайлы жазған болатынбыз. Онда Думан Мұхаммедкәрімнің қазіргі уақытта денсаулығы нашарлап, ауруханада жатқаны жайлы айтылған.

Бұған дейін Orda.kz оның соты жайлы жазды. Онда Думан Мұхаммедкәрім «сотқа сенім білдіресіз бе?» деген сұраққа: «Менде таңдау жоқ, сенсем де, сенбесем де сол! Менің үкімім баяғыда шығып қойған!» деп жауап берген болатын.

Еске сала кетейік, жиырмасыншы сотына Orda.kz тілшісі қатысып, соңғы сөзін естіп қайтты. Ол соңғы сөзінде тағылған айыптарды мойындамайтынын айтты. Сол кезде сот жоғарыдағы айып бойынша Думан Мұхаммедкәрімді жеті жылға бас бостандығынан айырған болатын.

Telegram ~ Instagram ~ WhatsApp