Думан Мұхамедкәрім: Менің үкімім баяғыда шығып қойған

12 ақпан күні журналист Думан Мұхамедкәрімге қатысты кезекті сот отырысы өтті, деп хабарлайды Orda.kz порталы.

Думан Мұхамедкәрім «сотқа сенім білдіресіз бе?» деген сұраққа: «Менде таңдау жоқ, сенсем де, сенбесем де сол! Менің үкімім баяғыда шығып қойған!», деді.

«Не дейді» YouTube-арнасының авторы Думан Мұхаммедкәрім «тыйым салынған ұйым ісіне араласу» және «экстремизмді қаржыландыру» баптары бойынша күдікке ілінді. Оған мұндай айыптың тағылуына оппозициялық саясаткер Мұхтар Әбіләзовтан алған сұхбаты түрткі болған.

Журналист 2023 жылдың маусым айынан бері қамауда отыр.

8 ақпанда халықаралық Human Rights Watch адам құқығын қорғау ұйымы Думан Мұхаммедкәрімге «экстремизм» бойынша негізсіз айып тағылып отырғанын алға тартып, Қазақстан билігін журналистке тағылған айыптарды алып тастап, өзін босатуға үндеді. Ал қазақстандық құқық қорғаушылар оны «саяси тұтқындар» қатарына қосқан.