«Болашақ» кімдердің бағын ашты

Ведомствода халықаралық стипендия мен «Ғылыми тағылымдамалар» бағдарламасының жаңа иегерлерінің есімдері жарияланды, деп хабарлайды Orda.kz.

Шетелде кадрлар даярлау жөніндегі республикалық комиссияның іріктеу қорытындысы бойынша 217 адам стипендия иегері атанды:

• олардың көпшілігі - 167 стипендиат - магистратураға оқуға жіберіледі;
• тағы 13-і докторантурада білімін жалғастырады;
• 37 қазақстандық әлемнің жетекші жоғары оқу орындары мен ғылыми орталықтарында кәсіби тағылымдамадан өтеді.

Болашақтықтардың шамамен екіден үш бөлігі (67,7%) жаратылыстану-техникалық пәндерді – инженерия, IT, ғылым және технология салаларын таңдаған. Қалған 32,3% – қоғамдық-гуманитарлық бағыттарды меңгереді.

Толық тізімді мына жерден көруге болады. 

«Бұдан бөлек, шетелде кадрлар даярлау жөніндегі республикалық комиссияның шешімімен 68 қазақстандыққа әлемнің жетекші ғылыми және зерттеу орталықтарында ғылыми тағылымдамадан өту үшін стипендия тағайындалды» деп жазылған хабарламада. 

Еске сала кетейік, бұған дейін президент Қасым-Жомарт Тоқаев «Болашақ» бағдарламасын сынға алған болатын. Ол шетелге оқуға 78 жастағы қазақстандықтың кеткен жағдайын мысал ретінде келтірген еді.

Бұған дейін Ғылым және жоғары білім министрлігі 2025–2026 оқу жылына арналған мемлекеттік білім беру грант иегерлерінің тізімін жариялады. Грант иегерлерінің толық тізімі министрліктің ресми сайтында, сондай-ақ Telegram-арналарында және Ұлттық тестілеу орталығының www.testcenter.kz сайтында қолжетімді.