Жетісуда жолға шықпау туралы ескертуді елемеген бес көлік апатқа ұшырады

Жетісу облысы аумағында бес автокөліктің қатысуымен жаппай жол-көлік оқиғасы тіркелді. Апат Үшарал — Достық автожолы бойында, ауа райының қолайсыздығына байланысты қозғалыс уақытша шектелген учаскеде болған, деп хабарлайды Orda.kz.      

Өңірлік полиция департаментінің мәліметінше, бұл жол бөлігінде қозғалыс 2026 жылғы 13 ақпан сағат 12:00-ден 17 ақпан сағат 09:00-ге дейін жабылған.

Полиция өкілдерінің хабарлауынша, аталған жол-көлік оқиғасы бойынша сотқа дейінгі тергеп-тексеру жүргізіліп жатыр. Олар қолайсыз ауа райына байланысты бұл учаскеде қозғалысқа уақытша шектеу енгізілгенін тағы да еске салды.

Соған қарамастан, бес жүргізуші қауіпсіздік талаптарын елемей, жабық жолға сапарға шыққан. Нәтижесінде көліктер бір-бірімен соқтығысқан.

Жол апаты салдарынан алты адам медициналық мекемеге жеткізіліп, қажетті көмек көрсетілді. Зардап шеккендердің алған жарақаттарының ауырлық деңгейі нақтылануда.

Полиция ресми түрде жабылған автожолға шыққандар әкімшілік жауапкершілікке тартылатынын ескертті. Қазақстан Республикасының Әкімшілік құқық бұзушылық туралы кодексінің 667-бабына сәйкес, жабық жолға шығу заңмен жазаланады.

Құқық қорғау органдары жүргізушілерді енгізілген шектеулерді қатаң сақтауға және өз өмірі мен өзге жол қозғалысына қатысушылардың қауіпсіздігін қатерге тікпеуге шақырды.

Осыдан 5 күн бұрын Ақтөбе – Орск тасжолында қайғылы жағдай болды. Opel маркалы жеңіл автокөліктің жүргізушісі қарсы бағыттағы жолаққа шығып кетіп,  жүк көлігі мен жеңіл автокөлік соқтығысып, төрт адам қаза тапты.

Оқи отырыңыз:

• Жыл басынан бері Қазақстанда 29 мыңнан астам көлік апаты болды
• Бір қызды аяғынан айырған жол апаты: Астанада жүргізушіге рақымшылық берілді
• Түнде Алматыда адам шошырлық көлік апаты болды, зардап шеккен үш адам ауруханада