Жатақханаға 100 мың теңге өтемақы кімдерге беріледі?

Елімізде кейбір студенттер жатақханада тұру шығындарын өтеу үшін жылына 100 050 теңгеге дейін қаржылай көмек ала алады. Бұл туралы Қазақстанның ғылым және жоғары білім министрі Саясат Нұрбек өзінің Telegram-арнасында жазды, деп хабарлайды Orda.kz.       

Жатақханада тұру шығындарын өтеуге арналған қаржылай қолдау бірнеше санаттағы студенттерге беріледі.  Олар жетім балалар, I және II топтағы мүгедектігі бар студенттер,  бала кезінен мүгедектігі бар студенттер.

Өтемақы мөлшері 29 айлық есептік көрсеткішке дейін, яғни жылына 100 050 теңге. Министрдің хабарламасында айтылғандай, бұл қолдау тек бірінші курс студенттерімен шектелмейді. Жоғарыда аталған санаттарға жататын студенттер екінші және үшінші курстарда да жатақханада тұру шығындарын өтеуге арналған төлем ала алады.

Осылайша, қаржылай көмек оқу кезеңінің бірнеше жылында көрсетіледі. Оның мақсаты студенттердің жатақханада тұруға жұмсайтын шығындарының бір бөлігін өтеу.

Бұл шара әлеуметтік тұрғыдан осал санатқа жататын студенттерді қолдауға бағытталған.

Біз бұған дейін  жатақханадан орын бұйырмаған Алматы студенттерінің қайда баратыны туралы жазғанбыз. Мемлекеттік грант қорытындысы шығып, біраз ата-ана мен түлектер қуанышқа бөленді. Ендігі мәселе студенттердің жатын орны. Осыған орай Алматыдағы QyzPU базасында студенттерді жатақханамен қамтамасыз етуге арналған Ситуациялық орталық жұмыс істеп жатыр.

Еске сала кетейік, екі күн бұрын магистратура бойынша 2026–2027 оқу жылына арналған білім гранттары иегерлерінің тізімі жарияланды.

Оқи отырыңыз:

• Жатақханадан орын бұйырмаған Алматы студенттері қайда барады?
• Алматыда меценаттар болашақ мұғалімдерге жатақхана салып берді