Жатақханадан орын бұйырмаған Алматы студенттері қайда барады?

Мемлекеттік грант қорытындысы шығып, біраз ата-ана мен түлектер қуанышқа бөленді. Ендігі мәселе студенттердің жатын орны. Осыған орай Алматыдағы QyzPU базасында студенттерді жатақханамен қамтамасыз етуге арналған Ситуациялық орталық жұмысын бастады, деп хабарлайды Orda.kz.       

Қазақстан Республикасы Ғылым және жоғары білім министрлігі мен Алматы қаласы әкімдігі бастамасымен жаңа оқу жылы қарсаңында Қазақ ұлттық қыздар педагогикалық университеті (QyzPU) базасында студенттерді жатақханамен қамтамасыз етуге арналған Ситуациялық орталық дәстүрлі түрде өз жұмысын бастады.

Орталықтың негізгі мақсаты – жатақханадан орын ала алмаған студенттерге жедел әрі тиімді көмек көрсету. Орталық Алматы қаласы, Бөгенбай батыр көшесі, 142 мекенжайында орналасқан.

Жоғары оқу орындарының цифрлық платформалары арқылы жатақханадан орын брондауға үлгермеген немесе орналасу кезінде қиындықтарға тап болған студенттер Ситуациялық орталыққа тікелей жүгіне алады. Орталық мамандары әр өтінішті жедел қарап, бос орындар базасы арқылы тиісті жатақханалардан немесе серіктес ұйымдардан уақытша тұру мүмкіндігін ұсынады.

Жедел қызмет көрсету мақсатында орталықта 8 толыққанды жұмыс орны ұйымдастырылған. Әрқайсысы заманауи компьютерлік техникамен, цифрлық деректер базасына қолжетімділікпен және бір мезетте 10 қоңырауды қабылдай алатын көпарналы байланыс жүйесімен жабдықталған. Бұл мамандарға қаладағы ЖОО-лар мен жатақхана әкімшіліктерімен үздіксіз байланыста болып, студенттердің мәселелерін жылдам шешуге мүмкіндік береді.

Орталық аумағында келушілерге барлық қажетті жағдай жасалған. Мұнда күту және демалыс аймағы, оқу бұрышы, кофе-брейк аймағы, сондай-ақ жиналыстар мен жедел брифингтер өткізуге арналған конференц-зал бар.

Оқи отырыңыз:

• Мемлекеттік грант иегерлері анықталды: 2026–2027 оқу жылының басты қорытындылары
• Қосымша қолдау жүйесі бар: Грантқа ілінбегендер не істейді?
• Қайрат Сатыбалдының жыр болған «Байсат» базары ақыры сатылды