Жаңа оқу жылында Алматыда 22,5 мың оқушыға арналған 12 жаңа мектеп ашылады

Алматыда Конституция күні мен Білім күніне орай, «Келешек мектептері» жобасы аясында 22 500 оқушыға арналған 12 жаңа мектеп есігін ашады. Бұл туралы Алматы қаласы әкімінің баспасөз қызметіне сілтеп Orda.kz хабарлайды.

Алматы қаласының әкімі Дархан Сатыбалды жаңа оқу жылына дайындық бойынша жұмыс кеңесін өткізді. Онда білім беру мекемелерінің дайындығы қаралды. Жаңа мектептер Теректі, Самғау, Қарасу, Ақбұлақ, Нұрлы Дала ықшам аудандарында, сондай-ақ Левитан көшесі мен Райымбек даңғылы, 210 мекенжайында орналасқан.

Қыркүйек айының соңына дейін қосымша 10 500 оқушыға арналған тағы 5 мектеп іске қосылады деп жоспарлануда.

Білім басқармасының басшысы Сайран Сайфеденовтің айтуынша, 2025–2026 оқу жылында Алматыда барлығы 353 мектеп жұмыс істейді.

Жаңа мектептерге 10 889 оқушы қабылданды. Оқу процесін ұйымдастыру үшін 693 педагог жұмысқа алынған: олардың 350-і enbek.kz порталы арқылы конкурс негізінде қабылданса, 343-і басқа білім беру ұйымдарынан ауыстырылған.

Сондай-ақ, қалада 44 мемлекеттік мектептің 7 532 оқушысы «Мектеп автобусы» жобасын пайдаланады. Жаңа мектептердің ашылуына байланысты бұл жобаға деген сұраныс арта түсуде.

1 қыркүйекте салтанатты жиындар тек 1-сынып және бітіруші сынып оқушылары үшін өтеді. Биыл бірінші сыныпқа 29 240 бала барады, ал 19 765 оқушы мектеп бітіреді. Қалған сыныптар үшін 2 қыркүйекте Білім күніне арналған «сынып сағаты» өткізіледі.

Сонымен қатар, Алматыда 88 колледж бар, онда 85 544 студент оқиды. Қала сыртынан келген студенттер үшін 46 жатақханада 6 100-ден астам орын бар, оның ішінде 10 мемлекеттік колледж жанындағы 11 жатақханада 2 200-ден астам орын қарастырылған.

Қалада 35 жоғары оқу орны жұмыс істейді, онда 202 мың студент білім алуда. Олар үшін 128 мың орындық студенттік жатақханалар қарастырылған.

Біз бұған дейін Алматыда 7 жаңа мектептің құрылысы аяқталып, ал тағы 4 мектепті биылғы тамыз айының соңына дейін  пайдалануға беруді жоспарланып отырғаны туралы хабарлағанбыз. 

Сонымен қатар жақында Алматыда жаңа мектептің қазақ тілінде ашылуын талап еткен мұғалім қамауға алынды. Алматыда ата-аналар жаңа мектептің аралас тілде ашылғанына қарсы болғаны туралы тілшіміздің зерттеу мақаласын мына жерден оқыңыз.