Алматыда жаңа мектептің қазақ тілінде ашылуын талап еткен мұғалім қамауға алынды

Алматыда жаңа №215 мектептің аралас тілде ашылуына қарсы шыққан белсенді әрі математика пәнінің мұғалімі Дархан Ардақұлы 15 тәулікке қамалды, деп хабарлайды Orda.kz.

Ол өзінің Facebook парақшасында хабарлағандай, «мектепке барамыз» деген сөзі үшін рұқсатсыз митингке шақырды деген айыппен жауапқа тартылған. Ардақұлы бұл айыппен келіспейтінін, тек өз пікірін білдіргенін айтты.

Белсенділер мен ата-аналар бұл мектеп алғашында тек қазақ тілінде болады деп уәде етілгенін, бірақ кейін аралас мектепке айналатыны хабарланғанын алға тартты. Олардың айтуынша, бұл аудан қазақ тіліндегі мектепке зәру.

Білім басқармасы мектеп тілін ата-аналардың сұранысына қарай анықтайтынын мәлімдеді. Шешім алдағы аптада қабылданады.

Қалада қазіргі таңда 215 мемлекеттік мектеп бар: 77 — қазақ тілінде, 57 — орыс тілінде, 78 — аралас, 3 — ұйғыр тілінде білім береді.

Ата-аналардың сөзіне қарағанда «Комфорт» тұрғын үй кешенінде тұратын қазақ балаларын аталған мектеп «біздің учаскеге жатпайсыздар» деген желеумен қабылдамай жатқан көрінеді.

Қаладағы Розыбақиев көшесі 254/3 мекенжайында орналасқан № 215 мектептің дәл жанында таза орыс тілінде сабақ беретін тағы бір мектеп бар екеніне қарамастан жаңа ашылған мектептің де аралас мектеп болатыны ата-аналардың наразылығын тудырып отыр. Себебі осы маңда тұратын тұрғындардың қазақ тілді мектепке деген сұранысы басым.