Жамбыл облысында лауазымын пайдаланып, ірі алаяқтық жасаған екі бұрынғы полицей сотталды

Өңірлік полиция департаменті бастығының бұрынғы орынбасары Жайдарбек Құттыбаев пен Талас аудандық полиция бөлімінің бұрынғы бастығы Еркен Абаевқа қатысты сот үкімі шықты. Жәбірленуші ретінде бұрынғы полиция қызметкері Дархан Уәлиев танылды, деп хабарлайды Orda.kz тілшісі.

Мемлекеттік айыптаушы Құттыбаевқа алты жыл, ал Абаевқа бес жыл бас бостандығынан айыру жазасын сұраған. Сот бұл ұсыныспен келісіп, оған қоса мемлекеттік органдарда қызмет атқаруға өмір бойы тыйым салды.

Жайдарбек Құттыбаев Қазақстан Республикасы Қылмыстық кодексінің 190-бабы 3-бөлігінің 1) және 2) тармақтары («Ірі мөлшерде жасалған, лауазымды тұлғаның қызметтік жағдайын пайдалану арқылы алаяқтық») бойынша кінәлі деп танылды.

Еркен Абаев Қылмыстық кодекстің 28-бабының 5-бөлігі («Қылмыстық құқық бұзушылыққа қатысушылардың түрлері») және 367-бабының 2-бөлігі («Елеулі мөлшерде пара беру») бойынша айыпты деп танылды.

Екеуі де өмір бойы мемлекеттік қызметте, құқық қорғау органдарында, жергілікті өзін-өзі басқару органдарында, қаржы ұйымдарында, бақылау және қадағалау құрылымдарында, сондай-ақ мемлекеттік және квазимемлекеттік секторда лауазым атқару құқығынан айырылды.

Еске салайық, алғаш болып полиция департаментінде кадр жұмысына жауапты болған Жайдарбек Құттыбаев ұсталған. Кейін осы іс бойынша Еркен Абаев қамауға алынды, ол біраз уақыт іздеуде болған.

Ұсталғандардан кейін облыстық полиция департаментінің басшысы Бақытжан Малыбаев та қызметінен босатылды.

Оқи отырыңыз:

• Шерзат Полаттың өлімінен кейін қызметінен босатылған полицей Ақтөбеде жаңа қызметке тағайындалды
• ҚР СІМ: Қазақстан босқындардың жаппай ағылуына жол бермейді
• «Алдымда өмір бойы түрме күтіп тұр»: Атыраудағы төрт адамның өліміне қатысты сотта 70 миллион теңге талап етілді