ҚР СІМ: Қазақстан босқындардың жаппай ағылуына жол бермейді

Қазақстанның Сыртқы істер министрі Ермек Көшербаев елге босқындардың көптеп келуі мүмкін деген қазақстандықтардың алаңдаушылығына қатысты пікір білдірді, деп хабарлайды Orda.kz.

Бұған дейін батыстық бұқаралық ақпарат құралдарында Еуроодақ елдері мигранттарды депортациялау үшін Қазақстан мен Өзбекстан аумағында экстерриториялық лагерьлер салуды жоспарлап отыр деген ақпарат тараған еді. Алайда бұл мәліметті еліміздің сыртқы саяси ведомствосы жедел түрде жоққа шығарды.

Министрдің айтуынша, Шенген аймағына кіретін елдер заңсыз көші-қонға байланысты шекаралық бақылауды күшейтуге құқылы. Қазақстан да заңсыз иммиграцияны азайту бағытында шаралар қабылдап жатыр.

«Бізде де осындай шаралар қолға алынған. Біз де заңсыз иммиграцияның көлемі мен санын азайтуға тырысып жатырмыз. Жалпы алғанда, оны толықтай жоюға ұмтыламыз», — деді министр. 

Көшербаев азаматтарда осындай алаңдаушылық болса, Сыртқы істер министрлігі әлеуметтік желілер арқылы қосымша түсіндіру жұмыстарын жүргізуге дайын екенін айтты.

«Біз әлеуметтік желілер арқылы тағы да түсіндіріп, негізгі мәселеге қатысты күмәндарды сейілтуге тырысамыз», — деді ол. 

Еске салсақ, биылғы наурыз айының басында БҰҰ-ның Босқындар ісі жөніндегі агенттігі Иран билігінің деректеріне сүйене отырып, соғыстың алғашқы екі күнінде Тегеран қаласынан шамамен 100 мың адам кеткенін мәлімдеген болатын.      

БҰҰ Босқындар ісі жөніндегі Жоғарғы комиссары басқармасының өкілі Балочтың айтуынша, күн сайын астанадан шамамен 1 000–2 000 автокөлік шығып отырған. Көліктер негізінен солтүстік бағытқа қарай бет алған.

Оқи отырыңыз:

• Соғыстың алғашқы екі күнінде Иран астанасынан 100 мың адам кетіп қалды — БҰҰ
• Димаш Құдайберген БҰҰ елшісі ретінде Бангладештегі босқындарға қолдау білдірді
• Стамбұл көшесінде Қазақстан азаматын атып кетті