«Алдымда өмір бойы түрме күтіп тұр»: Атыраудағы төрт адамның өліміне қатысты сотта 70 миллион теңге талап етілді

Атырауда төрт адамды өлтірді деп айыпталған Сұлтан Сәрсемәлиевке қатысты сот процесі жалғасып жатыр. Кезекті сот отырысында жәбірленуші тарап айыпталушыдан 70 миллион теңге өндіруді талап етті, деп хабарлайды Orda.kz.

Dalanews.kz мәліметінше, марқұм Мақсот Қарабалиннің қарындасы Әдемі Шылмағамбетова соттан Сәрсемәлиевтен 70 миллион теңге көлемінде моральдық және материалдық шығын өндіріп беруді сұраған.

Сотта айыпталушы талап арызбен келісетінін, алайда аталған ақшаны қайтара алатынына кепілдік бере алмайтынын айтты.

«Талап арызды қабылдаймын, бірақ қайтаратыныма кепілдік бере алмаймын. Алдымда өмір бойы түрме күтіп тұр», — деді Сұлтан Сәрсемәлиев.

Сот отырысында айыпталушы қылмысқа не себеп болғанын да түсіндіруге тырысты. Democrat.kz жазуынша, ол бірнеше жылға созылған ішкі күйзеліс пен марқұмдардың отбасымен болған жанжалдың салдарынан осындай қадамға барғанын айтқан.

Сәрсемәлиев бұрынғы әйелінің туыстары балаларын өздеріне алып қояды деп қорыққанын жеткізді.

«Олармен қаншама рет тіл табысқым келді. Бірақ болмады. Ішкі жан айқайымды түсіндіре алмадым. Балаларымды олар алып қойғанша, өзіме қол салайын деп те ойландым. Мен тіріде осылай болып жатыр, мен өлсем, балаларыма қиын болады ғой дедім. Анам немересінен, баласынан айырылады деп жаным күйді. Екі балам да шешеме бауыр басқан. Анамның тілін алатын. Нағашыларына барғысы келмей, өз әжесінің қасында жүргісі келетін. Түңілгеннен болды, жетіскеннен емес», деді ол. 

Басылымның жазуынша, бұл сөздерді айтқан кезде айыпталушының дауысы дірілдеп, көзіне жас алған. Қазіргі уақытта іс бойынша сот талқылауы жалғасып жатыр.

Оқи отырыңыз: 

• Қазақстанда медицина қызметкерлерінің жалақысын көтеруге 33 млрд теңге бөлінді
• Ормуз бұғазы маңындағы Иран портында Қазақстанның өз алаңы болады