Жалған қажылық ұйымдастырып, жұрттан 60 млн теңге жинап алғандар сотталды

Астананың екі тұрғыны алдын ала сөз байласу арқылы «Instagram» әлеуметтік желісіне Сауд Арабиясының Мекке және Мәдина қалаларына қажылық сапарын ұйымдастыратындары туралы жарнама жариялаған, деп хабарлайды Orda.kz.       
 

Қылмыскерлердің уәдесіне сеніп қажылыққа бармақшы болған 37 азамат оларға жалпы көлемде 60 млн теңге қаражаттарын бере салған.

Алайда олар мойындарына алған міндеттерін орындамай, жәбірленушілерден алынған ақшаны өз қалауларынша жұмсаған.

Астана қаласы прокуратурасының мәліметінше, сот үкімімен олардың әрқайсысына 4 жыл мерзімге бас бостандығынан айыру жазасы тағайындалды.

Жәбірленушілердің келтірілген материалдық залалды өндіру туралы азаматтық талап арыздары толық қанағаттандырылды.

Сот үкімі заңды күшіне енген жоқ.

Астана прокуратурасы азаматтарды сақ болуға және күмәнді тұлғаларға ақша қаражатын бермеуге шақырады.

Оқи отырыңыз:

• Алматыда қойма өртеніп жатыр: Өртті сөндіруге 63 маман тартылды
• Ресейлік стример Fasoollka арандату сөздерін айтқаны үшін елден шығарылды