Жалға пәтер беремін деп 20 адамды тақырға отырғызған алаяқ ұсталды

Астанада 27 жастағы Азамат Шүкіржановқа қатысты үкім шықты. Ол шамамен бес ай бойы «Крыша» платформасында пәтерді жалға беру туралы жалған хабарландыру жариялап, алдын ала төлем жинап, кейін байланыссыз тайып отырған, деп хабарлайды Orda.kz. 

Бұл алаяқтық схемасының құрбаны 20 адамға жеткен. Алаяқтық деректерінің көптігіне қарамастан, ер адам төрт жылға бас бостандығын шектеу жазасына кесілді.

Сот материалдарына сәйкес, 2025 жылдың қыркүйегінен 2026 жылдың қаңтарына дейін Шүкіржанов Krisha.kz платформасында пәтерді жалға беретіні туралы хабарландыру жариялап отырған. Алайда шын мәнінде ешқандай пәтерлер болмаған. Ол пәтердің фотоларын интернеттен алған, ал өзі тұрғын үй иесі емес және оны жалға беруге құқығы да болмаған. Әлеуетті жалға алушылар хабарласқанда, оларды алдын ала төлем жасауға көндіріп, ақша түскен соң байланысқа шықпай қойған.

Сот нұсқасы бойынша, Шүкіржанов 20 адамды алдап үлгерген. Аударылған ақша көлемі әртүрлі, 10 мыңнан 70 мың теңгеге дейін жеткен. Зардап шеккендердің көбі жоқ пәтерді жалға алу үшін 50–60 мың теңге көлемінде алдын ала төлем жасап тастаған.

Жәбірленушілер оқиғаларының барлығы дерлік ұқсас. Адамдар Krisha.kz сайтынан хабарландыру тауып, «жалдаушыға» хабарласып, келісімге келіп, ақша аударған. Осыдан кейін ол пәтер де, «иесі» де ғайып болған. Барлық жағдайда да айыпталушы төлем алған соң қоңыраулар мен хабарламаларға жауап беруді тоқтатқан.

Сотта Шүкіржанов өз кінәсін толық мойындады. Ол пәтер жалға беру туралы хабарландыруларды шын мәнінде ешқандай баспанасы болмаса да жариялағанын растады. Адамдардан алған ақшаны өзінің банк картасына түсіріп, қалауы бойынша жұмсаған.

Істі қарау кезінде жәбірленушілерге келтірілген барлық шығын толық өтелген. Олардың басым бөлігі соттан істі өз қатысуынсыз қарауды сұрап, жаза тағайындау мәселесін соттың қарауына қалдырған.

Сот Шүкіржановтың бастапқыдан-ақ уәдесін орындауды көздемегенін, ал жалған хабарландыруларды тек ақша табу үшін пайдаланғанын анықтады. Алаяқтық бірнеше рет, ақпараттық жүйе арқылы және бірнеше адамға қатысты жасалғандықтан, оның әрекеті Қылмыстық кодекстің 190-бабы 3-бөлігі бойынша сараланды.

Жаза тағайындау кезінде сот бірнеше жеңілдететін мән-жайларды ескерді. Ол кінәсін толық мойындауы, өкінуі, бұрын сотталмағаны, келтірілген зиянды өз еркімен өтеуі және жәбірленушілердің оған қарсы талаптардың болмағаны. Ауырлататын мән-жайлар анықталмады.

Нәтижесінде ол кінәлі деп танылып, оған мынадай жаза тағайындалды: төрт жыл бас бостандығын шектеу, осы мерзімге пробациялық бақылау, сағат 22:00-ден 06:00-ге дейін үйден шығуға тыйым салу, жұмыссыз болған жағдайда жыл сайын 100 сағат мәжбүрлі еңбек, сондай-ақ сараптама нәтижесінде анықталған алкогольге тәуелділікке байланысты ем қабылдау міндеттелді.

Оқи отырыңыз:

• «Адвокат» әкімнің аузын айға қаратып кетті 
• АҚШ 50 елдің азаматтарына 20 мың долларға дейін визалық кепілдік енгізеді