АҚШ 50 елдің азаматтарына 20 мың долларға дейін визалық кепілдік енгізеді

АҚШ 3 тамыздан бастап әлемнің 50 елінің азаматтары үшін тұрақты визалық кепілдік енгізеді. Олардың қатарында Грузия, Қырғызстан, Тәжікстан және Түрікменстан бар, деп хабарлайды  Orda.kz.        

Енді виза алу кезінде олар 20 мың долларға дейін кепілдік төлеу тиіс. Бұл туралы АҚШ Мемлекеттік департаменті хабарлады.

Әңгіме іскерлік және туристік визаларға (B-1/B-2) қатысты. Кепілдік мөлшерін әр жағдайда консулдық қызметкері жеке анықтайды.

Сыртқы саясат ведомствосының мәліметінше, егер виза иесі белгіленген мерзімде АҚШ-тан кетсе, визаны пайдаланбаса немесе оған елге кіруге рұқсат берілмесе, төленген кепілдік қайтарылады. Ал егер адам елде болу шарттарын бұзса, кепілдік қаражат ұсталып қалады.

Тізімге Грузия, Қырғызстан, Тәжікстан және Түрікменстаннан бөлек, Алжир, Ангола, Бангладеш, Камбоджа, Орталық Африка Республикасы, Моңғолия, Непал, Никарагуа, Тунис, Уганда, Венесуэла, Зимбабве және Африка, Оңтүстік-Шығыс Азия мен Латын Америкасының басқа да елдері енген.

Қазақстан бұл тізімге кірмеген.

АҚШ Мемлекеттік департаменті бұл шешімді аталған елдердің азаматтары визалық режимді жиі бұзатынымен түсіндірді. Кепілдік енгізу визаны заңсыз пайдалану мен елде рұқсат етілген мерзімнен артық қалу жағдайларын азайту үшін қажет.

Бұған дейін кепілдік бағдарламасы пилоттық режимде жұмыс істеген, онда өтініш берушілерге жағдайға байланысты 5 мыңнан 15 мың долларға дейін кепілдік белгіленетін. Енді ең төменгі 5 мың долларлық шек алынып тасталып, ең жоғарғы қараажат 20 мың долларға дейін артты.

Associated Press агенттігінің мәліметінше, 2024 жылы осы тізімдегі елдердің азаматтары АҚШ-та болу мерзімін шамамен 45,5 мың жағдайда асырып жіберген. Ал пилоттық жоба іске қосылған алғашқы 10 айда мұндай жағдайлар 50-ден аз болған.

Оқи отырыңыз:

• Ағайынды алты егіз мерзімді әскери қызметін бірге өткеріп жүр
• TikTok-тағы алаяқ «ҰҚК майорына» Петропавлда үкім шықты