Жаһандық экологияға қауіп: Оман мен Иран жағалауындағы мұнай төгінділері

Оман мен Иран жағалауында бірден бірнеше мұнай төгілу жағдайы тіркелді.  Ең ірі төгінді Оман жағалауында қайраңға шөккен, бұл Caroline Bezengi танкерінің апатқа ұшырауынан кейін болған, деп хабарлайды Orda.kz. 

Иран аумағындағы сулардан тағы екі мұнай дағы анықталды. Reuters мәліметінше, 8 маусымда Caroline Bezengi танкері Йемен жағалауындағы аумақтан өткеннен кейін бортында зақым пайда болғанын хабарлаған. Теңіз ведомстволары кемеде жарылыс болуы мүмкін екенін де мәлімдеген.

Апаттың нақты себебі ресми түрде анықталған жоқ, сондай-ақ оқиғаға жауапкершілікті ешкім мойнына алған жоқ. Ықтимал нұсқалардың бірі ретінде магниттік минаға түсіп қалу жағдайы қарастырылып отыр.

Осыдан кейін кеме зақымданып, дрейфке кеткен. CBS News мәліметінше, экипаж кемені тастап кеткен. Маусым айының соңында танкер Оманның оңтүстік-батыс жағалауындағы Халаният архипелагына кіретін Киблия аралы маңында қайраңға отырған. Кемеде шамамен 800 мың баррель мұнай болған. Апаттан кейін зақымданған танкерден шикі мұнай теңізге төгіле бастаған.

Экологиялық қызметтердің мәліметінше, төгілген мұнай дағы аумағы 2 мың шаршы шақырымнан асты. 13 тамызда ластану Arab News мәліметінше, Оманның Рас-Мадрак аймағындағы жағалауға жеткен. Сондай-ақ Масира аралы жағалауы да қауіпке ұшырады.

Мұнай төгіндісі әсіресе Халаният аралдары маңындағы теңіз қорығына қауіп төндіріп отыр. Бұл аумақта араб бүкір киттері, теңіз тасбақалары және теңіз құстары мекендейді. Мұнайдың теңіз суына ұзақ уақыт түсуі теңіз жануарларына, маржан рифтеріне және жағалау экожүйелеріне елеулі зиян келтіруі мүмкін.

Қазір мамандар кеменің жағдайын тұрақтандырып, ластанудың таралуын шектеуге тырысып жатыр. Операцияны британдық Ambrey компаниясы үйлестіруде. Құтқару кемелері, авиация және 100 тоннадан астам жабдық жұмысқа тартылды. Жұмыстарға маусымдық муссондық жағдай мен қатты жел кедергі келтіруде.

Соңғы уақытта  Иранның аумақтық суларынан тағы екі мұнай дағы анықталды.

Біріншісі Ормуз бұғазындағы Кешм аралының оңтүстік шетіне жақын жерде пайда болған. TankerTrackers.com мониторинг қызметінің мәліметінше, оның пайда болуы Либерия туын көтеріп жүрген Minoan Pioneer құрғақ жүк кемесімен байланысты болуы мүмкін.

3 тамызда кеме Ормуз бұғазынан өтіп бара жатқан кезде белгісіз снаряд шабуылына ұшыраған. Бір экипаж мүшесі хабар-ошарсыз кеткен. Иран Сыртқы істер министрлігінің өкілі алдын ала мәліметтер шетелдік құрғақ жүк кемесін ластанудың ықтимал көзі ретінде көрсететінін мәлімдеді.

Бұқаралық ақпарат құралдары мен мониторинг ұйымдарының мәліметінше, шабуылды Иран жасаған. Алайда Тегеран бұл шабуылға жауапкершілікті ресми түрде мойындаған жоқ.

Мұнай Оман жағалауындағы құрғақ жүк кемесіне жасалған шабуылдан кейін теңізге төгілген, кейін оны теңіз ағысы Иран жағалауына қарай қайта алып келген.

Екінші мұнай дағы 13 тамызда Кешмнен шамамен 100 шақырым оңтүстік-батыстағы Сирри аралының маңынан анықталды. Бұл аумақта Иранның мұнай-газ нысандары орналасқан. Ластанудың нақты көзі әзірге анықталған жоқ.

Иран Сыртқы істер министрлігінің өкілі Исмаил Бағаи Парсы шығанағы, Ормуз бұғазы және Оман теңізінің ластануы елдің жағалау аймақтарына триллиондаған доллар көлемінде зиян келтіргенін мәлімдеді.

Осылайша, өңір бір мезетте бірнеше экологиялық апатқа ұшырап отыр. Бұл жағдай Иран, Израиль, АҚШ және түрлі қарулы топтар арасындағы әскери текетірес, сондай-ақ Қызыл теңізде, Ормуз бұғазында және Оман шығанағында коммерциялық кемелерге жасалған шабуылдардың жиілеуі кезінде болып жатыр.

Бұған қоса, әскери жағдай құтқару және экологиялық қызметтердің зақымданған кемелерге жетуді қиындатып, төгінділер салдары жою жұмыстарын одан әрі күрделендіріп отыр.

Оқи отырыңыз:

• Иран Трамптың Ормуз бұғазын АҚШ-тікі деп жариялау жоспарына жауап берді
• ДСМ балаларға стоматологиялық көмек қолжетімділігін шынайы қамтамасыз етуді тапсырды