Зеленский: Украина Таяу Шығыс елдерімен бірге ұшқышсыз ұшатын аппарат шығарады

Украина президенті Владимир Зеленский Сауд Арабиясы, Қатар және Біріккен Араб Әмірліктерімен ұшқышсыз ұшу аппараттарын (БПЛА) өндіру жөнінде келісім жасалғанын мәлімдеді, деп хабарлайды Orda.kz  DW-ге сілтеме жасап.

DW мәліметінше, Владимир Зеленскийдің Telegram-арнасында жарияланған ақпаратқа сәйкес, Украина Таяу Шығыстың үш елі – Сауд Арабиясы, Қатар және БАӘ-мен бірлесіп дрондар өндіру және оларға қарсы жүйелер құру туралы келісімге келген.

Оның айтуынша, бұл келісімдер Украинадағы мемлекеттік және жекеменшік секторлармен жасалатын түрлі келісімшарттар арқылы жүзеге асырылады.

«Украина өз тәжірибесімен бөлісуге, оқыту жүргізуге және әртүрлі әскери техникаларды бір жүйеге біріктіруге арналған бағдарламалық қамтамасыз етуді ұсынуға дайын. Сонымен қатар, Таяу Шығыс елдерімен бірлесіп дрондар өндіру туралы сөз болып отыр», – деді Владимир Зеленский. 

Ол сондай-ақ Киев осындай келісімдерді Вашингтонмен де жасай алатынын атап өтті.

«Менің ойымша, мұның барлығын АҚШ-пен де бөлісу керек. Егер біз бұған қол жеткізсек, мен мақтанатын боламын, өйткені біз АҚШ-тың қолдауына өте ризамыз», – деді Украина президенті. 

Еске салсақ, «Дружба» мұнай құбырының жұмысы қалпына келгеннен кейін Еуроодақ Ресейге қарсы санкциялардың 20-пакетін және Украинаға 90 млрд еуро көлемінде несие бөлуді мақұлдады. Брюссель бұл қаржыны Киевке беру туралы шешімді өткен жылдың желтоқсанында қабылдағанымен, оны жүзеге асыруды Венгрия бұғаттап келген.

Оқи отырыңыз:

• Еуроодақ Украинаға 90 миллиард еуро несие беретін болды
• Украина Ресейдің мұнай инфрақұрылымына ауқымды соққы жасады
• Украина Назарбаевқа арналған барельефті алып тастамайтын болды