Еуроодақ Украинаға 90 миллиард еуро несие беретін болды

Еуроодақ «Дружба» мұнай құбырының жұмысы қалпына келгеннен кейін Украинаға 90 млрд еуро несие беруді мақұлдады, деп хабарлайды Orda.kz.      

Еуроодақ Ресейге қарсы санкциялардың 20-пакетін және Украинаға 90 млрд еуро көлемінде несие бөлуді мақұлдады. Брюссель бұл қаржыны Киевке беру туралы шешімді өткен жылдың желтоқсанында қабылдағанымен, оны жүзеге асыруды Венгрия бұғаттап келген.

2026 жылдың қаңтар айының соңынан бастап Будапешттің басты талабы – Украина аумағындағы зақымданған «Дружба» мұнай құбыры арқылы ресейлік мұнай жеткізілімін қайта жандандыру болды. Қазір құбырдың жұмысы қалпына келтірілді.

Кипрде өткен бейресми саммитте (қазіргі таңда бұл ел ЕО Кеңесіне төрағалық етеді) еуропалық елдердің елшілері Украинаға несие бөлуге алдын ала келісім берді. Құжаттарға ресми қол қою рәсімі 23 сәуір, бейсенбі күні аяқталуы тиіс. Сол күні Кипрде Еуроодақ елдерінің басшылары да кездеседі.

Украина президенті Владимир Зеленский бұл шешімді қолдап:

«Бұл – қазіргі жағдайда дұрыс шешім, Ресей соғысты тоқтатуы тиіс. Ал оған түрткі болатын жағдай – Украинаға жеткілікті қолдау мен Ресейге қысымның күшеюі», – деді. 

Оның айтуынша, Украина Еуроодақ алдындағы міндеттемелерін, соның ішінде «Дружба» мұнай құбырына қатысты күрделі мәселелерде де орындап отыр. Германия үкіметінің өкілі (Reuters мәліметінше) Венгрия жазбаша қарсылық білдірмесе, Украина 90 млрд еуроны 24 сағат ішінде ала бастайтынын айтты.

Reuters дерегінше, бұл қаражат 2026 жылы кемінде 52 млрд АҚШ доллары жетіспейтін Украина бюджетін теңгеруге көмектеседі. Экономистердің пікірінше, егер бұл несие берілмесе, Киев маусым айына қарай қаржылық қиындықтарға тап болуы мүмкін.

Еурокомиссияның экономика жөніндегі комиссары Валдис Домбровскис 2026 жылы Украина 45 млрд еуро, ал 2027 жылы тағы 45 млрд еуро алуы тиіс екенін мәлімдеді.

Венгрия, кейіннен Словакия да, қаңтардың соңында «Дружба» арқылы ресейлік мұнай жеткізілімінің тоқтауына байланысты Украинаға несие беруді және Ресейге қарсы жаңа санкциялар пакетін қолдаудан бас тартқан болатын.

21 сәуірде Владимир Зеленский құбыр жөндеу жұмыстарының аяқталғанын жариялады. Оның айтуынша, Украина Еуроодақпен келісімге сәйкес зақымданған учаскені қалпына келтірген. 22 сәуірде «Дружба» мұнай құбыры қайта іске қосылды. Украина энергетика саласындағы дереккөздің айтуынша, мұнай транзиті қайта басталған. Беларусьтің «Белнефтехим» компаниясы да бұл ақпаратты растады.

Венгрияның ірі мұнай-газ компаниясы MOL мәліметінше, Украина учаскесі іске қосылғаннан кейін алғашқы мұнай жеткізілімдері Венгрия мен Словакияға 23 сәуірден кешікпей жетеді деп күтілуде. Словакия экономика министрі Дениса Сакова да жеткізілімдердің бейсенбі күні таңертең басталатынын растады.

2026 жылдың қаңтар айының соңында «Дружба» мұнай құбыры ресейлік соққы салдарынан зақымданып, жұмысын тоқтатқан болатын. Венгрия мен Словакия, ресейлік мұнай мен газға әлі де тәуелді елдер ретінде, Киевті жөндеу жұмыстарын созып отыр деп айыптаған. Ал Еуроодақ құбырды қалпына келтіруге көмектесуді ұсынған.

Венгрияда «Дружба» мәселесі және Украинаға қолдау көрсету тақырыбы премьер-министр Виктор Орбанның «Фидес» партиясының сайлауалды науқанының негізгі тақырыптарының біріне айналды.

12 сәуірде өткен парламенттік сайлауда «Фидес» партиясы оппозициялық «Тиса» партиясынан жеңіліп қалды. Петер Мадьяр 9 мамыр күні ант беріп, елдің жаңа премьер-министрі болады.

Оқи отырыңыз:

• БАҚ: Украина әскери қимылдарға арналған қаражат тапшылығына ұшырады
• Украина Назарбаевқа арналған барельефті алып тастамайтын болды
• Тақырып «Украина мәселесін реттеу» болмақ: Зеленский келіссөз үшін Швейцарияға келді