Зеленский Киевтің Мәскеумен жаңа келіссөздер өткізуге дайын екенін мәлімдеді

Украина Президенті Владимир Зеленский сенбі күні кешкі бейнеүндеуінде Киевтің Ресеймен жаңа келіссөздер раундына бастама жасағанын мәлімдеді, деп хабарлайды Orda.kz «Обозревательге» сілтеме жасап.

Зеленскийдің айтуынша, Украина Ұлттық қауіпсіздік және қорғаныс кеңесінің хатшысы Рустем Умеров Мәскеуге келесі аптада кездесу өткізуді ұсынған.

«Келіссөз үдерісі қарқынды жүруі тиіс. Атысты тоқтатуға қол жеткізу үшін бар күшімізді салуымыз қажет. Ресей тарапы шешімдерден қашуды доғаруы керек.
Тұтқындармен алмасу. Балаларды қайтару. Қан төгуді тоқтату және шынайы әрі ұзақ мерзімді бейбітшілікті қамтамасыз ету үшін мемлекет басшылары деңгейінде кездесу қажет. Украина осындай кездесуге дайын», — деді Украина басшысы. 

Ресей тарапымен кездесу қай жерде және нақты қай күні өткізуді ұсынылғаны әзірге нақты айтылған жоқ. Бұған дейін ресейлік және украин делегациялары арасында бейбіт реттеу мәселелері бойынша келіссөздер 16 мамыр және 2 маусымда Стамбұлда өткен болатын.

Биылғы мамырдың басындағы Ресей мен Украина арасындағы Стамбұлдағы келіссөздер немен аяқталғанын мына жерден оқыңыздар. 

Сәуір айының соңында Владимир Путин мен Американың арнайы өкілі Стивен Уиткоффтың кездесуінен кейін Дональд Трамп Ресей мен Украина арасындағы қақтығысты реттеу жөніндегі мүмкін келісімнің көптеген ережелері келісілгенін мәлімдеді.

Ақпан айында Макрон Украина мәселесі бойынша Парижде  Еуроодақтың төтенше саммитін өткізуге шақырды.

Наурызда Эр-Риядта Украинадағы қақтығысты реттеу бойынша АҚШ пен Ресей делегацияларының  жабық кездесуі өтіп, Украина мәселесі Украинасыз талқыланды.

26 сәуірде өтеді деп күтілген Украина президенті Владимир Зеленский мен АҚШ президенті Дональд Трамптың Ватикандағы екінші кездесуі болған жоқ, себебі Трамп мен оның жұбайы Рим Папасы Францискті жерлегеннен кейін тез арада Римден кетіп, АҚШ-қа оралды.