Макрон Украина мәселесі бойынша Парижде Еуроодақтың төтенше саммитін өткізуге шақырды

Франция президенті Эммануэль Макрон АҚШ-тың Ресей мен Украина арасындағы қақтығысты реттеуге қатысты соңғы мәлімдемелеріне, сондай-ақ «Трамп тарапынан қойылған сын-қатерлерге» байланысты төтенше ЕО саммитін шақырды, - деп хабарлайды Orda.kz Politico басылымына сілтеме жасап.

Эммануэль Макрон дүйсенбі күні Парижде еуропалық көшбасшыларды төтенше саммитке шақырып жатқанын Польша Сыртқы істер министрі Радослав Сикорски Мюнхен қауіпсіздік конференциясында мәлімдеді.

«Президент Макронның біздің көшбасшыларды Парижге шақырғанына өте қуаныштымын», - деді Сикорски. 

Ол сонымен қатар еуропалық көшбасшылардан АҚШ президенті Дональд Трамп қойған қиындықтарды «өте байыпты» талқылауды күтетінін айтты.

«Президент Трамптың ресейліктер «соғыс арқылы барлау» деп атайтын әдісі бар: аллдымен қысым жасайды, не болатынын байқайды, содан кейін бірден позициясын өзгертіп... әрекетке көшеді», - деді поляк министрі. 

Кездесуге ЕО-ның барлық көшбасшылары қатыса ма, әлде шағын ғана елдер тобы қатыса ма, сондай-ақ Ұлыбритания премьер-министрі Кейр Стармер сияқты басқа еуропалық көшбасшылар шақырыла ма, әзірге белгісіз, деп жазады басылым.

Мюнхенде Сикорскимен бір топта болған Франция Сыртқы істер министрі Жан-Ноэль Барро төтенше саммитті растамады да, жоққа да шығармады.

Бұған дейін Украина президенті Владимир Зеленский еуропалық әскер құруға шақырып, континент енді АҚШ-тың қорғанысына сене алмайтынын және тек күшті армиямен ғана Вашингтонның құрметіне ие болатынын айтқан  болатын.

Bloomberg бұған дейін АҚШ пен Ресейдің жоғары лауазымды шенеуніктерінің Трамп-Путин саммитіне дайындық үшін келесі аптада кездесетінін хабарлаған. Кездесуде Украина өкілдері болуы мүмкін, бірақ Еуроодақ өкілдері болмайды.