Зейнетақы мен жәрдемақыны уақытында төлемеу өрескел бұзушылыққа жатады

Қазақстанда зейнетақы, жәрдемақы және әлеуметтік төлемдерді тағайындау мен төлеуді бақылау қағидалары жаңартылды. Енді төлемдердің кешіктірілуі елеулі бұзушылық болып саналады, деп хабарлайды Orda.kz.

Бұл өзгерістер Еңбек және халықты әлеуметтік қорғау министрлігі мен Ұлттық экономика министрлігінің бірлескен бұйрығына енгізілді. Құжат Мемлекеттік корпорация мен оның филиалдарының әлеуметтік қамсыздандыру саласындағы тексерістерін реттейді.

Тексеру парағына 12 талап қосылды. Олардың қатарында жүктілік пен босану бойынша, бала бір жарым жасқа толғанға дейін күтім жасау, жұмысынан айырылу, еңбекке қабілеттілігін жоғалту, асыраушысынан айырылу жағдайларына байланысты төлемдерді тағайындау бар. Сондай-ақ зейнетақы, жәрдемақы және әлеуметтік төлемдерді уақытында әрі толық аудару талаптары енгізілген. Аталған бұзушылықтардың барлығы өрескел болып саналады.

Бұдан бөлек, қаражатты банктік шоттарға «Орталықтандырылған деректер базасы» жүйесі арқылы аудару критерийі нақты көрсетілді. Егер төлем уақытында түссе – 0% бұзушылық, ал кешіксе – 100% бұзушылық болып есептеледі.

Тексерушілер сондай-ақ «Орталықтандырылған деректер базасы» мен «Е-макет» жүйелері арасындағы зейнетақы, жәрдемақы және әлеуметтік төлем алушылар деректерін салыстырады. Бұл жүйелер арасындағы сәйкессіздіктер де тексеру парағына енгізілген.

Оқи отырыңыз:

• Америкалық БАҚ Израиль Ливанды атқылағанда ақ фосфор қолданды деп шулап жатыр
• Түркістан облысының түлегін әлемнің 80 университеті оқуға шақырды
• Алматыда тұрғын үй жертөлесінен жасырын есірткі плантациясы табылды