Түркістан облысының түлегін әлемнің 80 университеті оқуға шақырды

Түркістан облысындағы Қ.Аманжолов атындағы №22 жалпы білім беретін мектептің түлегі Медина Нұрәлі әлемнің жоғары оқу орындарынан 80-нен астам шақырту алды, деп хабарлайды Orda.kz Оқу-ағарту министрлігіне сілтеме жасап.

Министрліктің Telegram-арнасында қазақстандық түлек АҚШ, Канада, Ұлыбритания, Түркия, Біріккен Араб Әмірліктері және Еуропа елдеріндегі жоғары оқу орындарына оқуға шақырылғаны айтылды.

«Нұрәлі Медина IELTS және SAT халықаралық емтихандарын сәтті тапсырып, әлемнің жетекші университеттеріне түсуге қажетті академиялық дайындық деңгейін көрсетті. Қазіргі таңда ол көптеген ұсыныстың ішінен Оңтүстік Кореядағы Inha University оқу орнын таңдауды жоспарлап отыр», деп мәлімдеді ведомство. 

Министрлік мәліметінше, Медина мектепте үздік оқушылардың қатарында болған және ғылыми, зияткерлік әрі қоғамдық жобаларға белсенді қатысқан.

Атап айтқанда, ол «Жасанды интеллект – ғылыми зерттеудің жаңа мүмкіндігі» тақырыбындағы ағылшын тілі бойынша республикалық ғылыми-шығармашылық конференцияда I орын иеленіп, «Ой зерек» республикалық олимпиадасының жеңімпазы атанған.

Еске салсақ, Шымкенттік А.Пушкин атындағы №1 мектеп-гимназиясының 11-сынып оқушысы Набира Перналы шетелдік 90 жоғарғы оқу орнынан шақырту алғанын жазғанбыз.  Ол шетелдік жоғары оқу орындарының гранттық бағдарламаларына қатысып, АҚШ, Канада, Ұлыбритания, Австралия, Еуропа елдері және Біріккен Араб Әмірліктеріндегі жетекші университеттерден шақырту алған.       

Дарынды түлек оқуын Оңтүстік Кореядағы INHA University-де жалғастыруды таңдады. Ол аталған университеттің «Халықаралық бизнес және қатынастар» мамандығы бойынша білім алады.

Оқи отырыңыз:

• Биыл 3,9 миллион түлек мектеп бітірді, 13 175 оқушы «Алтын белгіге» үміткер
• Еліміздегі ҰБТ-дан шекті балл жинаған талапкерлер күмән туғызды
• Шымкенттік түлек шетелдің 90 жоғарғы оқу орнынан шақырту алды