«Заң және тәртіп»: Қазақстан мектептерінде үш жаңа міндетті пән болады

Жаңа оқу жылынан бастап Қазақстан мектептерінде оқушыларға арналған үш жаңа міндетті сабақ енгізіледі. Енді оқушылар «Конституция негіздері», «Заң және тәртіп», «Жеке қауіпсіздік» пәндерін оқиды, деп хабарлайды Orda.kz.

Бұл туралы Үкімет отырысында оқу-ағарту министрі Жұлдыз Сүлейменова мәлімдеді. Осы оқу жылынан бастап 5–7 сынып оқушыларына «Конституция негіздері», 8–11 сыныптарға «Заң және тәртіп», ал 5–11 сыныптарға «Жеке қауіпсіздік» курстары енгізіледі.

Сонымен қатар, бұрын таңдау бойынша оқытылған «Құқық негіздері» пәні барлық оқушы үшін міндетті болады. Оның мазмұны жаңа Конституция нормаларына сәйкес жаңартылады.

Министрдің айтуынша, бүгінде еліміздегі 8 мыңнан астам мектепте 4,1 млн оқушы білім алып жатыр. Биыл 380 мың бала бірінші сыныпқа қабылданады.

Еске сала кетейік, бұған дейін Қазақстан мектептерінің бастауыш сыныптарында жаңа оқу жылынан бастап бөлім бойынша жиынтық бағалау (БЖБ) және тоқсан бойынша жиынтық бағалау (ТЖБ) өткізілмейді.

Оның орнына оқушылардың білімін күнделікті қалыптастырушы бағалауға басымдық беріледі. Мұғалімдер аралық бақылаудың түрін өздері таңдай алады. Оның ішінде диктант, мазмұндама, шығарма, жоба, ауызша және практикалық жұмыстар қарастырылған.

Сонымен қатар, Оқу-ағарту министрлігі бастауыш сыныптардағы бағалау тәсілін қайта қарап, формативтік бағалау үлесін арттырып, аралық бағалау енгізеді. Ал тоқсан соңындағы жеке жиынтық бағалау жұмысы енді болмайды.

Оқи отырыңыз:

• 1 қыркүйектен бастап бастауыш сыныптарда БЖБ мен ТЖБ болмайды. Олардың орнына не енгізіледі?
• Бірінші сыныпта баға қойылмайды: Жаңа оқу жылынан бастап бағалау жүйесі өзгереді