Үш күнде 2400-ден астам жасөспірім полицияға жеткізілді: Себебі не?

Қазақстан полициясы кәмелетке толмағандар арасындағы құқықбұзушылықтардың алдын алу және олардың қауіпсіздігін қамтамасыз етуге бағытталған ауқымды профилактикалық іс-шаралардың қорытындысын шығарды, деп хабарлайды  Orda.kz Polisia.kz-ке сілтеме жасап. 

1–3 шілде аралығында рейдтер Алматы, Шымкент қалаларын, сондай-ақ Алматы облысы, Жамбыл облысы, Маңғыстау облысы, Павлодар облысы, Солтүстік Қазақстан облысы, Қызылорда облысы, Абай облысы және Ұлытау облысы аумақтарын қамтыды.

Іс-шараларға шамамен үш мың полицей қатысты.

Полицияға 2400-ден астам кәмелетке толмаған жеткізілді, оның ішінде 1500-ден астамы әкімшілік құқықбұзушылық жасағаны үшін, ал 1000-ға жуығы қараусыз және панасыз жүргені үшін тіркелген. Барлығы 4000-ға жуық әкімшілік құқықбұзушылық анықталды.

Сондай-ақ 257 ата-ана балаларын тәрбиелеу міндеттерін орындамағаны үшін әкімшілік жауапкершілікке тартылды. Тағы шамамен 1500 ата-ана кәмелетке толмағандардың түнгі уақытта көшеде және ойын-сауық орындарында жүргені үшін жауапқа тартылған.

Полиция мұндай профилактикалық шаралар тұрақты түрде өткізілетінін мәлімдеді.

«Құрметті ата-аналар! Балалардың қауіпсіздігі — ең алдымен отбасының жауапкершілігі. Жазғы демалыс кезінде балаларыңыздың немен айналысып жүргеніне ерекше назар аударуларыңызды, олардың қайда екенін, кіммен араласатынын және бос уақытын қалай өткізетінін бақылауда ұстауларыңызды сұраймыз», — деп мәлімдеді Қазақстан Ішкі істер министрлігі. 

Соңғы кезде жасөспірімдер арасындағы бұзақылық пен қылмыс деңгейі өсіп отырғаны баршаға мәлім. Жақында ғана Алматы полициясы 12 жастағы баланың өліміне қатысты  тергеу барысы туралы мәлімет берді. 

Кісі өлтірді деген күдікпен марқұммен таныс болған 13 жастағы алматылық жасөспірім ұсталған еді. Полиция мәліметінше, қылмысты тергеу үшін арнайы жедел-тергеу тобы құрылған. Сотқа дейінгі тергеу аясында барлық қажетті тергеу әрекеттері жүргізіліп жатыр.

Сонымен қатар Алматы облысында полиция қызметкерінің қаза болуына қатысты іс бойынша ұсталған кәмелетке толмағандарға қатысты сот бұлтартпау шарасын таңдады. Қорғаушылардың сөзінше, қазіргі уақытта жасөспірімдер үйлерінде отыр. Сот қаулысына сәйкес, оларға электронды бақылау құралдары (білезіктер) орнатылып, бейнебақылау жүйесі қойылуы тиіс.

Оқи отырыңыз:

• Алматы полициясы 12 жастағы баланың өліміне қатысты тергеу барысы туралы мәлімет берді
• 9 рет пышақ сұққан: 12 жастағы баланы қатыгездікпен өлтірген, марқұмның анасы оқиға қалай болғанын айтып берді
• Алматылық полицейді өлтіріп, денесін өртеп жіберген: Ұсталған жасөспірімдер үйқамақта болады