Алматылық полицейді өлтіріп, денесін өртеп жіберген: Ұсталған жасөспірімдер үйқамақта болады

Алматы облысында полиция қызметкерінің қаза болуына қатысты іс бойынша ұсталған кәмелетке толмағандарға қатысты сот бұлтартпау шарасын таңдады, деп хабарлайды Orda.kz.

Адвокат Гаухар Сариева мен Динара Шәмшекованың айтуынша, Кеген аудандық сотының тергеу судьясы тергеу органдарының өтінішін қарап, олардың кәмелетке толмаған қорғауындағы тұлғаларын үйқамаққа жіберу туралы шешім шығарған.

Қорғаушылардың сөзінше, қазіргі уақытта жасөспірімдер үйлерінде отыр. Сот қаулысына сәйкес, оларға электронды бақылау құралдары (білезіктер) орнатылып, бейнебақылау жүйесі қойылуы тиіс.

Сондай-ақ сот отырысы барысында адвокаттар қайғылы жағдайға әкелуі мүмкін барлық мән-жайларды жан-жақты тексеру қажеттігін атап өтті.

«Сот отырысында қорғау тарапы тергеу аясынан тыс қалдыруға болмайтын жайттарға назар аударды. Балалар ұзақ жылдар бойы жүйелі түрде зорлық-зомбылық пен қатыгездік жағдайында өмір сүрген болуы мүмкін екенін жоққа шығармаймыз. (...)
Біз мұны дәлелденген факт ретінде айтпаймыз, сондықтан бұл материалдар тергеу барысында мұқият тексерілуі тиіс» деп жазылған  хабарламада. 

Еске салайық, 23 маусым күні Алматы облысы Кеген ауданының таулы аймағында жергілікті малшы полиция қызметкерінің жанып жатқан денесін тауып алған.

2026 жылғы 23 маусымда шамамен сағат 15:00-де Кеген аудандық полиция бөліміне күйген мәйіттің табылғаны туралы хабарлама түскен. Тергеу деректеріне сәйкес, мәйіт Көкпек — Көктал — Кеген автожолының 52-шақырымында, Кеген асуы маңында, трассадан шамамен 400 метр қашықтықта, таулы аймақ ішінен табылған.

Осы іс бойынша марқұмның жұбайы мен оның кәмелетке толмаған ұлы ұсталған. Сонымен қатар, олармен бірге тағы бір жасөспірімнің де ұсталғаны туралы расталмаған ақпарат тарады.

Аталған дерек Сотқа дейінгі тергеп-тексерудің бірыңғай тізіліміне тіркелді. Бастапқыда іс ҚР Қылмыстық кодексінің 99-бабы 1-бөлігі — «кісі өлтіру» бойынша қозғалған. Кейін іс 99-баптың 2-бөлігі 5 және 7-тармақтарына, яғни ауырлататын мән-жайлармен жасалған кісі өлтіру бабына қайта сараланған.

Алдын ала мәлімет бойынша, қылмысқа марқұмның жұбайының қатысы болуы мүмкін. Ол бұған дейін Алматы қаласы Бостандық ауданы полициясында қызмет еткен, ал 2026 жылдың ақпан айында өз еркімен жұмыстан шыққан.

Полиция қылмыстық іс қозғады. Тергеушілер ер адамның өлімінің мән-жайын анықтап жатыр.

Оқи отырыңыз:

• Алматылық полицейді өлтіріп, денесін өртеп жіберген: Іс бойынша әйелі мен ұлы ұсталды
• Атырау облысында 90 жастағы қарияны баласы ұрып-соғып, қамап ұстаған
• Ақтөбе облысында 102 адам мейрамханадағы астан уланып, ауруханаға түсті