Үкімет ЖЭО-лардағы жөндеу жұмыстары туралы айтты

Үкімет Қазақстандағы жылу электр орталықтарындағы  жабдықтарды жөндеу жұмыстарының қанша бөлігі аяқталғаны туралы мәлімет берді, деп хабарлайды Orda.kz.       

2026 жылға жалпы тоғыз энергия блогын, 55 қазандықты және 51 турбинаны күрделі жөндеуден өткізу жоспарланған. Қазіргі уақытта жұмыстар кестеге сай жүргізіліп жатыр екен, алайда кейбір нысандарда жасырын ақаулар анықталған.

Үкімет берген дерек бойынша екі энергия блогы толық дайын, тағы екеуі жөндеуде, 13 қазандық толық жөнделді, 27-сінде жұмыс жалғасуда. Сегіз турбина пайдалануға берілді, 16 нысанда жөндеу жұмыстары әлі жүріп жатыр.

Сонымен қатар, ел бойынша 500-ден астам қосалқы жабдыққа жоспарлы ағымдағы жөндеу жүргізілуде.

Желілерде де кешенді жұмыстар атқарылып жатыр екен. Қазірдің өзінде шамамен 6,3 мың шақырым электр беру желісі, 135 қосалқы станция және 1 253 тарату пункті жөнделді. Жыл соңына дейін 17 мың шақырымнан астам электр желісі мен 3,4 мыңнан астам тарату пунктін жаңарту жоспарланған. Республика бойынша жоспарланған 377 шақырым құбырдың 65 шақырым жылу желісі дайын, тағы 278 шақырымында жұмыстар қарқынды жалғасуда. Үкімет кестеден кешігу жоқ екенін атап өтті.

Елдің солтүстік және шығыс өңірлерінде жылу желілері 1 қыркүйекке дейін толық дайын болады, ал 15 қыркүйекке қарай станцияларда негізгі жөндеу аяқталады. Қазақстанның оңтүстік және батыс аймақтарында жылыту маусымы кешірек басталатындықтан, негізгі жұмыстарды қыркүйек айының соңына дейін аяқтау жоспарланып отыр.

Қатты аяз болған жағдайда мемлекет қорларды алдын ала ұлғайтып жатыр. Қазір энергия көздері қоймаларында шамамен 3,5 млн тонна көмір жиналған — бұл өткен жылдың осы кезеңімен салыстырғанда 8%-ға көп, сондай-ақ 143 мың тонна мазут бар.

Биыл электр станцияларын жөндеуге нысан иелері 384 млрд теңге бөлген. Бұл өткен жылмен салыстырғанда 9%-ға артық. Әзірге тәуекелі жоғары «қызыл» аймақта бес жылу электр орталығы бақылауда тұр: Семей, Орал, Тараз қалаларындағы ЖЭО, сондай-ақ Ақтаудағы ЖЭО-2 және Теміртаудағы МАЭС -1.

Оқи отырыңыз:

• Берлинде көлік шеруге шыққандарды қағып кетті: бір адам қаза тауып, тағы 16 адам жараланды
• «Қайрат» «Ордабасыны» жеңді: Ойын соңы жанжалға ұласты