Берлинде көлік шеруге шыққандарды қағып кетті: бір адам қаза тауып, тағы 16 адам жараланды

Германия астанасы Берлинде жеңіл көлік адамдар көп жиналған жерге кіріп кетіп, салдарынан бір адам қаза тапты. 16 адам жарақат алған, олардың үшеуінің жағдайы ауыр. Бұл туралы BILD басылымы хабарлады.

Алдын ала мәлімет бойынша, оқиға Тиргартен ауданында ЛГБТ-прайд шеруі өтіп жатқан кезде болған. Көлік жүргізушісі оқиға орнынан қашып кеткен.

Полиция шабуылға қатысы болуы мүмкін деген күдікпен 21 жастағы Абдула Б.-ны іздестіріп жатыр. Тергеу мәліметінше, ол радикал исламшыл топтармен байланыста болған және 2026 жылдың мамыр айында кәмелетке толмағандарға арналған түзеу мекемесінен босап шыққан. Алайда құқық қорғау органдары әзірге көлікті дәл осы адамның жүргізгенін және оның жалғыз әрекет еткенін растаған жоқ.

Кейбір куәгерлердің айтуынша, көлік ағашқа соғылып тоқтағаннан кейін жүргізуші сыртқа шығып, айналасындағыларға пышақпен шабуыл жасаған. Бірақ бұл ақпарат әзірге ресми түрде расталмаған.

Оқиғаның мән-жайы анықталып жатыр. 

Оқи отырыңыз:

• Трамп Иранға жасалатын соққыны тоқтатуға бұйрық берді
• АҚШ Иран уранын қолға түсіру үшін күрделі операция дайындап жатыр – БАҚ