Үй, көлік, қомақты ақша ұсынды: Қонаевта бойжеткен зорлық көргенін айтты

Алматы облысы Қонаев қаласында бойжеткен зорланғанын айтып, шағым түсірді. Оқиға кезінде ол 17-де болған. Енді ол әділ шешім болмай ма деп алаңдап отыр. Оның айтуынша, күдіктінің отбасы ықпалды әрі жағдайы бар, ал іс бойынша сот процесі жүріп жатыр. Orda.kz редакциямызға хабарласқан Алматы қаласының тұрғыны оқиғаның мән-жайын айтып берді. 

Жәбірленушінің сөзінше, оқиға былтыр шілде айында болған. Ол кезде қыз кәмелетке толмаған — 17 жаста еді.

«Менің бір құрбым болды. Өте жақын едік. Бір күні ол туған күні жақындап қалғанын айтып,  мені Алакөлге баруға көндірді. Ол жақта оның жігіті, өзі және ағасы болатынын айтты. Мен бұл туралы әпкеме айттым, ол бірден қарсы болып, ондай адамдармен әрі алысқа жібермейтінін айтты. Ол кезде мен құрбымның ағасын мүлде танымайтынмын, неге дәл сол құраммен бармақ болғандарын да түсінбедім», — дейді ол.

Оның айтуынша, кеш барысында құрбысының туған ағасы жиналғандарды алкоголь ішуге мәжбүрлеген.

«Мен құрбыма «үйіңде, Қонаевта атап өтейік» дедім. Ол келісті. Кейін мені оның жігіті алып кетуі керек болды. Бірақ қасына неге екенін білмеймін, туған ағасы да бірге келді. Мен үндемедім, олар мені алып, бірге жолға шықтық. Жолда ағасы менің жасымды сұрады. Ол біздің колледжде бірге оқығанымызды, құрбым екеуміздің жасты екенімізді білетін. Мен 17 жастамын дедім. Ол «18-ге толсаң, сені әйелдікке аламын» деді. Мен жауап бермедім, себебі оны мүлде танымайтынмын, оның менен үлкен екені көрініп тұрды және мұндай сөздер маған ұнамады. Үйге барып, туған күнді тойлай бастадық. Құрбым екеуміз аздап іштік, өйткені оның туған күні еді. Бірақ кейін ол бәрін ішуге мәжбүрлей бастады. Сол жердегілердің бәрі кәмелетке толмаған, тек ағасы ғана ересек еді, ал менің құрбым сол күні 18-ге толып жатқан», — дейді жәбірленуші.

Қыздың айтуынша, кейін не болғанын толық есіне түсіре алмайды. Бірақ ол ұйықтап қалып, қатты ауырсынудан оянған.

«Мен қатты мас болып қалдым. Таза ауаға шығу үшін далаға шықтым, жүрегім айнып тұрды. Сол кезде ол менің қасыма келіп, тиісіп, бұталардың арасына қарай сүйреп, ұстап, құшақтай бастады. Мен оны итеріп, қарсыластым. Кейін үйге қалай кіргенім де есімде жоқ. Мен жыныс мүшемнің қатты ауырғанынан есімді жиып алдым. Бұған дейін менде ешқашан жыныстық қатынас болмаған. Не болып жатқанын шамалап түсіндім. Оны итеріп, тоқтауын талап еттім, жылап жібердім. Ол мені ұстап, ешкімге айтпауымды сұрады. Мен қайта-қайта итеріп жіберуге тырыстым, бірақ шамам жетпеді», — дейді ол.

Келесі күні қыз полицияға арыз жазғанын айтты.

«Кейін шыдай алмай, бәрін әпкеме айттым. Ол бірден Алматыға қайтуымды айтты және құрбыма да айтуымды сұрады. Мен құрбыма бәрін айттым. Ол жылап, мені қолдап, психологтың ақысын төлеп беретінін, бұл іс бойынша арыз жазу керектігін айтты, «бұл менің ағам емес» деді. Сосын біз екеуміз оның үйіне барып, мен заттарымды алдым. Ол маған такси шақырып берді. Мен үйге қайттым. Ол менің әпкеме жазып, бәрін айтып, кешірім сұрап, жылап жатты. Үйге келген соң әпкем мені гинекологқа жіберді. Дәрігер тексеріп, жыртылу бар екенін айтты, бірақ нақты қорытындыны тек сараптама ғана анықтайтынын жеткізді. Келесі күні біз анама бәрін айтып, бірге барып арыз жаздық. Соңында арыз тіркелді», — дейді ол.

Қазіргі таңда сот жабық өтіп жатыр. Жәбірленуші тарапты алаңдатып отырған бір мәселе —   істің ортасына келгенде прокурордың ауысып кеткені. 

«Айтпақшы, тергеу кезінде оның отбасы маған келіп, көп ақша, пәтер, көлік ұсынып, арызды қайтарып алуды немесе айтқанымды өзгертуді сұрады. Бұл — өте бай, ықпалды отбасы. Оның әпкесі прокуратурада жұмыс істеген, қазір судьяның оқуын оқып жүр. Іс басында болған прокурорды алып тастады. Неге екенін білмеймін. Сол кезде әділдік бардай көрінген», — дейді жәбірленуші.

Оның айтуынша, күдіктінің отбасы Қонаев қаласында ықпалды, байланыстары бар адамдар. Сот барысында қысым мен қорлау болғанын да жасырмады.

«Сотта мені қорлап, «ақшасы жоқ, бейшара», «ішкіш»  деп атады. Менде олар сияқты байланыс та, таныс та жоқ», — дейді жәбірленуші.

Сот қазіргі таңда Қарасай аудандық сотында жабық өтуде.  Orda.kz редакциясы осы іске қатысты ресми сауал жолдады. Сонымен қатар екінші тарапты тыңдауға әзір. Orda.kz бұл істі өз бақылауында ұстайды. 

Оқи отырыңыз:

• Мұхтар Шахановтың соңғы аманаты жарияланды
• Павлодарда қайтыс болған адамдарға «медициналық қызмет көрсетілген»