Венесуэладағы жер сілкінісі: Құрбандар саны 1,4 мыңға жетті

Венесуэлада 24 маусымда болған жойқын жер сілкінісінен кейін қаза тапқандар саны 1,4 мыңнан асты, деп хабарлайды Orda.kz.

РИА Новости агенттігінің жазуынша, қаза тапқандар мен зардап шеккендер туралы соңғы мәліметті Ұлттық ассамблея төрағасы Хорхе Родригес жариялады.

«Өкінішке қарай, біз 1 430 отандасымыздың қаза тапқанын тіркедік. Олардың отбасылары мен жақындарына қайғырып көңіл айтамыз», – деді спикер ұлттық телеарна көрсеткен кезекті брифингте. 

Саясаткердің айтуынша, 3 238 зардап шеккен адамға медициналық көмек көрсетілген. Сонымен қатар билік баспанасыз қалған 3 142 отбасын тіркеп, оларды уақытша баспаналарға орналастырған және қажетті көмек көрсетіп жатыр.

Бұған дейін  Венесуэлада 24 маусымда болған жойқын жер сілкіністері туралы хабарлаған едік. Әлеуметтік желілерде көптеген ғимараттардың қирағаны түсірілген кадрлар тарады. Кейін елде төтенше жағдай режимі енгізілді.

Ұлттық ассамблея төрағасы Хорхе Родригестің мәліметінше, жер сілкіністері салдарынан 8 аурухана, 20 сауда орталығы және 68 инфрақұрылым нысаны зақымданған. Жалпы 250 ғимарат бүлінген немесе толықтай қираған.

Алғашқы мәліметтер бойынша, кемінде 32 адам қаза тауып, 700-ден астамы жарақат алған. Кейінірек 920 адамның көз жұмғаны хабарланған. Тағы кемінде 172 адам үйінді астында қалған.

Сонымен қатар Венесуэлада бір әйел жойқын жер сілкінісі салдарынан қираған ғимарат үйінділері арасында сәбиін дүниеге әкелгені белгілі болды. Бұл бірнеше жерасты дүмпулерінен кейін болған.

Оқи отырыңыз:

• Венесуэла жағалауында магнитудасы 7,1-ге тең жойқын жер сілкінісі болды
• Венесуэлада болған жер сілкінісінен қаза тапқандар саны 200-ден асты
• Елде бір ғана президент бар — Венесуэла Мадуро тұтқындалғаннан кейін АҚШ-қа жауап қатты