Ұрлықтың алдын алу шарасы күшейтілді: Фермерлерге арналған жағармай үш түске боялды

Қазақстанда фермерлерге жеңілдетілген бағамен берілетін дизель отынын мақсатсыз пайдалануды азайту үшін жаңа бақылау тетіктері енгізілді, деп хабарлайды Orda.kz.       

Энергетика министрлігі дизель отынына түрлі-түсті таңбалау мен цифрлық бақылау жүйесін енгізді. Енді ауыл шаруашылығына арналған жанармай сары, көк және қызыл түстерге боялады. Әр партияға жеке PIN-код беріледі. Отын қозғалысы электрондық шот-фактуралар жүйесіндегі виртуалды қойма арқылы қадағаланады.

Ведомство мәліметінше, осы шаралардың нәтижесінде жеңілдетілген дизельді мақсатсыз пайдалану 21%-ға қысқарған. Нақты тұтыну көлемі 729 мың тоннадан 602 мың тоннаға дейін төмендеген. Бұған дейін арзан жанармайдың бір бөлігі делдалдардың қолына өтіп, егістікке жетпей қалатын болған.

Жыл басында Энергетика және Ауыл шаруашылығы министрліктері егіс науқанына 402 мың тонна дизель жеткізу кестесін бекітті. Отын 1 ақпан мен 30 маусым аралығында тасымалданады. Ұсынылған баға жеткізу станциясына дейін литріне 263 теңгені құрады. Аймақтық операторлардың үстемеақысын есептегенде, соңғы баға 281 теңгеге жеткен. Бұл орташа бөлшек сауда бағасынан 49 теңгеге немесе 15%-ға арзан.

Айта кетейік, 2025 жылдың күзінде солтүстік өңірлердегі фермерлер жеңілдетілген дизельдің сапасына шағымданған болатын. Атырау мұнай өңдеу зауытынан жеткізілген отын алғашқы суықта парафин бөліп, техниканың жұмысын қиындатқан. «ҚазМұнайГаз» компаниясы бұл жағдайды фермерлерге қателікпен қысқы емес, жазғы дизель жіберілгенімен түсіндірген еді. Кейін мәселе шешіліп, жеткізілім Павлодар мұнай-химия зауытына ауыстырылған.

Оқи отырыңыз:

• 27-29 мамыр күндері Владимир Путин мемлекеттік сапармен Қазақстанға келеді
• Ақтау әуежайында асқазанына салмағы 1 келі болатын 114 капсула апиын жұтып, елге кірмек болған шетел азаматы ұсталды
• Елімізде қатерлі ісік пен сирек ауруларға қарсы дәрі шығарылады