27-29 мамыр күндері Владимир Путин мемлекеттік сапармен Қазақстанға келеді

27-29 мамыр күндері президент Қасым-Жомарт Тоқаевтың шақыруымен Қазақстанға Ресей Федерациясының президенті Владимир Путин мемлекеттік сапармен келеді, деп хабарлайды Orda.kz.      

Екі мемлекеттің басшылары келіссөз барысында Қазақстан мен Ресей арасындағы жан-жақты стратегиялық серіктестіктің және одақтастық қатынастардың қазіргі жай-күйін, сондай-ақ оны нығайту перспективасын талқылайды.

28 мамырда Еуразиялық экономикалық одаққа мүше мемлекеттер басшыларының қатысуымен Еуразиялық экономикалық форум өтеді.

29 мамырда Жоғары Еуразиялық кеңес отырысы ұйымдастырылады. Ақорданың мәліметінше, басшылар екіжақты стратегиялық серіктестікті талқылайды. Сондай-ақ сапар аясында Еуразиялық экономикалық форум және Жоғары Еуразиялық экономикалық кеңес отырысы өтеді.

Осыған орай елордада қызу дайындық басталды. Қала тұрғындары әскери ұшақтардың аспанды Ресей туының түсіне бояп, сынақ ұшырылымдарын жасағанын байқаған. Бұдан бөлек, Астанадағы негізгі жолдарда, оның ішінде Қалдаяқов пен Тәуелсіздік көшелерінде көлік қозғалысы шектелді.

Қауіпсіздік шаралары да басты назарда. Полиция мен Ұлттық ұлан қызметкерлері күшейтілген қызмет режиміне көшіп, әскери бөлімдердің бірінде жеке құрамның жалпыгарнизондық сап түзеуі өтті.

Еске салсақ, 19 мамыр кешінде Владимир Путин Си Цзиньпиннің шақыруымен ресми сапармен Қытайда болды. 

Алдымен көшбасшылар шағын құрамда келіссөз жүргізіп, кейін кездесу кеңейтілген форматта жалғасты. Путиннің айтуынша, соңғы 25 жылда Ресей мен Қытай арасындағы тауар айналымы 30 есеге артқан. 

Оқи отырыңыз:

• Екі ел арасындағы әріптестікке 30 жыл: Путин мен Си Цзиньпин Қытайда не шешті?
• Тәуелсіздік сарайында Кения президентін ресми қарсы алу рәсімі өтті
• БҰҰ-ның Гаагадағы халықаралық соты ереуілге шығу құқығы туралы шешім шығарды